Трамп: ЗША перададуць Украіне ракеты Tomahawk, калі Расія не спыніць вайну

• 13.10.2025, 7:36

Вашынгтон гатовы перадаць ЗСУ наступальныя ракеты.

Прэзідэнт ЗША Дональд Трамп заявіў, што разглядае магчымасць папярэдзіць расійскага дыктатара Уладзіміра Пуціна пра намер дазволіць пастаўкі Кіеву ракет Tomahawk, калі вайна ва Украіне не скончыцца.

Пра гэта паведамляе CNN

Прэзідэнт ЗША адзначыў, што яшчэ не вырашыў, ці пастаўляць зброю. Але прызнаў, што гэта прывядзе да эскалацыі канфлікту.

«Яны хацелі б атрымаць Tomahawk. Гэта крок наперад. Шчыра кажучы, магчыма, мне давядзецца пагаварыць з Расіяй пра Tomahawk», — сказаў ён, дадаўшы, што паведаміў пра гэта прэзідэнту Украіны Уладзіміру Зяленскаму падчас тэлефоннай размовы.

Паводле слоў Трампа, ён не выключае, што звернецца да Пуціна з папярэджаннем.

«Я магу сказаць: “Паслухайце, калі гэтая вайна не будзе ўрэгуляваная, я вышлю ім Tomahawk”. Tomahawk — гэта неверагодная зброя, вельмі наступальная зброя. І, шчыра кажучы, Расіі гэта не трэба», — сказаў прэзідэнт ЗША.