Нідэрланды перадалі Украіне карабель Alkmaar

• 12.10.2025, 20:22

Да канца 2025 года краіна павінна перадаць яшчэ адзін.

Нідэрланды перадалі Украіне супрацьмінны карабель тыпу Alkmaar. Да канца 2025 года краіна павінна перадаць яшчэ адзін. Пра гэта паведаміў камандуючы Ваенна-марскіх сіл Узброеных Сіл Украіны Аляксей Неіжпапа у нядзелю, 12 кастрычніка.

«Нядаўна ад партнёраў мы атрымалі супрацьмінны карабель тыпу Alkmaar, да канца года чакаем перадачу яшчэ аднаго. Падрыхтоўка экіпажа ўжо працягваецца», — адзначыў Неіжпапа.

Ён паведаміў, што 12 кастрычніка сустрэўся з нідэрландскай дэлегацыяй на чале з міністрам абароны краіны Рубэнам Брэкелмансам і галоўнакамандуючым Узброеных Сіл Нідэрландаў генералам Онно Айхельсхаймам.

Неіжпапа адзначыў, што падчас сустрэчы яны абмеркавалі сітуацыю з бяспекай у Чорнаморскім рэгіёне і перспектывы далейшага супрацоўніцтва.

Камандуючы ВМС Узброеных Сіл Украіны таксама падзякаваў Нідэрландам за намаганні і супрацоўніцтва ў межах Кааліцыі марскіх магчымасцяў Украіны.