Вольфовіч «патлумачыў», навошта армію ў Беларусі прывялі ў вышэйшую ступень баявой гатоўнасці
- 12.10.2025, 14:16
Зараз праходзіць другі этап.
Дзяржаўны сакратар Савета бяспекі Аляксандр Вольфовіч пракаментаваў ход раптоўнай праверкі баявой гатоўнасці Узброеных Сіл Беларусі. Паводле яго слоў, гэтыя мерапрыемствы сталі адказам на «істэрыю Захаду» і вучэнні, што праходзяць у суседніх краінах. Пра гэта паведамляе прэс-служба Мінабароны.
Нагадаем, 11 кастрычніка Мінабароны паведаміла пра пачатак комплекснай праверкі баявой гатоўнасці Узброеных Сіл, у ходзе якой шэраг падраздзяленняў быў прыведзены «ў вышэйшыя ступені баявой гатоўнасці».
12 кастрычніка пачаўся другі этап праверкі. Паводле слоў Аляксандра Вольфовіча, падчас першага былі адпрацаваныя пытанні прывядзення ў баявую гатоўнасць, укамплектавання і выхаду ў раёны засяроджання.
— Перш за ўсё мы ацэньвалі, ці ўлічваецца досвед спецыяльнай ваеннай аперацыі пры выкананні інжынерных работ. Так, сапраўды, мы бачылі, што досвед улічваецца, — распавёў Вольфовіч, дадаўшы, што таксама адпрацоўваліся пытанні тактычнай маскіроўкі і аховы ад беспілотнікаў і дыверсійна-разведвальных груп.
На другім этапе воінскія часці здзяйсняюць маршы ў раёны прызначэння, у тым ліку з пераадоленнем водных перашкод па навядзеных понтонных пераправах.
— Здзейсненне маршу адбываецца ў складаных умовах. Наша рэспубліка, скажам так, мае шмат розных рачных загарод і перашкод. Таму гэтыя пытанні неабходна, вядома, улічваць і адпрацоўваць. У тым ліку былі раптоўна правераныя інжынерныя падраздзяленні Паўночна-Заходняга аператыўнага камандавання — як яны ўмеюць наводзіць пераправы ў найкарацейшы час. Бачым, з задачай справіліся, — адзначыў дзяржсакратар Савета бяспекі.
Каментуючы знешнепалітычную абстаноўку, Аляксандр Вольфовіч заявіў, што «істэрыя Захаду працягваецца».
— Тая мілітарысцкая схільнасць, тая палітыка, якую Захад сёння праводзіць у дачыненні да нашай краіны, у дачыненні да Расійскай Федэрацыі, на жаль, не выклікае спакою. І ўсе гэтыя праверачныя мерапрыемствы якраз нацэленыя на тое, каб паказаць у тым ліку і Захаду: калі што, мы будзем гатовыя абараніць сваю краіну, — сказаў ён.
Паводле слоў Вольфовіча, цяпер на тэрыторыі Еўропы праходзіць каля 14 вучэнняў, сем з іх — у Польшчы і краінах Балтыі, у тым ліку на палігонах Пабраде і Гайжюнай, размешчаных у 15–95 кіламетрах ад беларускай мяжы.
— Адпрацоўваюцца пытанні баявой падрыхтоўкі, наступальная тэматыка. Мы бачым, што сёння адбываецца ўздоўж дзяржаўнай мяжы: ідзе адсяленне мірных грамадзян, 50-кіламетровая зона ачышчаецца, высечваюцца лясы, усталёўваюцца розныя інжынерныя загароджанні ўздоўж дзяржаўнай мяжы. На што гэта нацэлена? Нібыта на абарону ад пагрозы з Усходу. Але мы ніякай пагрозы нікому не ствараем, — падсумаваў дзяржсакратар Савета бяспекі.