FT: ЗША абралі цэлі і спланавалі ўкраінскія атакі ў глыбіні Расіі

• 12.10.2025, 17:02

Амерыканскія вайскоўцы ўжо некалькі месяцаў дзеляцца з ЗСУ разведвальнымі данымі.

Газета The Financial Times (FT) паведаміла, што ўкраінскія атакі на нафтаперапрацоўчыя заводы і іншыя аб'екты ў Расіі за апошнія месяцы сталі настолькі паспяховымі, у тым ліку дзякуючы дапамозе Пентагона.

Паводле FT, амерыканскія вайскоўцы ўжо некалькі месяцаў дзеляцца з ЗСУ разведвальнымі данымі, якія дапамагаюць планаваць атакі беспілотнікаў. Больш за тое, як паведамляе газета, амерыканскія вайскоўцы бралі ўдзел ва ўсіх этапах планавання атак.

Крыніцы The Financial Times патлумачылі, што галоўная мэта Вашынгтона — аслабіць эканоміку Расіі і прымусіць Уладзіміра Пуціна сесці за стол перамоў з Кіевам.

Паводле слоў некалькіх украінскіх і амерыканскіх чыноўнікаў, знаёмых з сакрэтнымі аперацыямі, амерыканскія разведвальныя даныя, перададзеныя Кіеву, дазволілі нанесці ўдары па важных расійскіх энергетычных аб'ектах, уключаючы нафтаперапрацоўчыя заводы, далёка за межамі лініі фронту.

Афіцыйна Белы дом не каментуе свой магчымы ўдзел у планаванні удараў ЗСУ па расійскіх НПЗ у глыбіні тэрыторыі і ўдалечыні ад лініі фронту.

Аднак, паводле FT, разведка ЗША дапамагае Кіеву планаваць маршруты, вышыню палёту і нават час, што дазваляе ўкраінскім беспілотным лятальным апаратам далёкага радыуса дзеяння ўхіляцца ад расійскіх сродкаў ППА.

Паводле іншых крыніц, Вашынгтон не толькі дапамагаў планаваць на падставе мэтаў, пададзеных Украінай, але нават сам прапаноўваў прыярытэтныя аб'екты для атак.

Са свайго боку, прэзідэнт Украіны Уладзімір Зяленскі адмаўляецца раскрываць падрабязнасці супрацоўніцтва з разведкай ЗША ў нанесенні яго арміяй глыбокіх удараў па тэрыторыі Расіі. Ён толькі пацвердзіў, што Кіеў «супрацоўнічае з разведкай ЗША, у першую чаргу, каб абараніць сябе».