РФ змяніла тактыку атак на энергааб'екты Украіны

• 11.10.2025, 21:25

Цяпер удары наносяцца па чарзе па рэгіёнах.

Краіна-агрэсар РФ змяніла падыход да паветраных атак на энергааб'екты Украіны. Пра гэта 11 кастрычніка ў эфіры нацыянальнага тэлемарафону паведаміў першы намеснік міністра энергетыкі Украіны Арцём Някрасаў.

Відэазапіс апублікаваны на YouTube-канале «Ми – Україна».

«Мы разумеем, што вораг перыядычна змяняе сваю тактыку. Калі 2–3 гады таму яны выбіралі буйныя аб'екты перадачы [электраэнергіі] і наносілі ўдары па іх практычна адначасова, то зараз яны працуюць ад рэгіёна да рэгіёна», – адзначыў Някрасаў.

Паводле яго слоў, задача Украіны – прыцягненне ўсіх магчымых рэсурсаў мясцовых адміністрацый, ДСНС, аналітычных кампаній і кампаній аварыйных брыгад, каб «максімальна хутка запітаць усё, што ідзе».

Някрасаў распавёў, што з-за расійскіх паветраных атак самая складаная сітуацыя цяпер у Чарнігаўскай, Харкаўскай, Сумскай абласцях і на Данбасе.

Акрамя таго, шмат брыгад энергетыкаў працуюць у Адэскай вобласці, каб да канца дня забяспечыць спажыўцоў электразабеспячэннем па рэзервовых схемах, праінфармаваў першы намеснік міністра энергетыкі.