Якія фільмы дапамагаюць пахудзець

• 11.10.2025, 19:39

Навукоўцы вызначылі, колькі калорый спальвае адзін фільм.

Прагляд 90-хвіліннага фільма жахаў у сярэднім дапамагае спаліць каля 150 калорый. Гэта прыкладна столькі ж, колькі траціцца падчас 30-хвіліннай хады або лёгкага бегу. На гэта паказваюць вынікі даследавання, праведзенага ў Універсітэце Вестмінстэра, піша UNILAD Tech.

Адзначаецца, што ў эксперыменце ўдзельнічалі 10 чалавек, якія паглядзелі 10 розных фільмаў жахаў. Даследчыкі ўсталявалі, што напружаныя сцэны ў фільмах жахаў прымушаюць сэрца біцца часцей і актывізуюць абмен рэчываў, дзякуючы чаму арганізм расходуе больш энергіі.

Нягледзячы на тое, што колькасць спаленых калорый залежала і ад самога гледача, і ад узроўню пужальных момантаў, выснова аказалася відавочнай: чым страшней фільм, тым больш інтэнсіўна арганізм спальвае калорыі.

«Кожны з 10 фільмаў выклікаў у гледачоў пачашчанае сэрцабіцце. Калі пульс паскараецца і кроў хутчэй цыркулюе па целе, арганізм перажывае выкід адрэналіну. Гэты гармон, які выпрацоўваецца пры кароткачасовым стрэсе або страху, зніжае апетыт, павышае базавы ўзровень метабалізму і спрыяе больш інтэнсіўнаму спальванню калорый», — адзначыў старшы выкладчык і спецыяліст па клеткавым метабалізме і фізіялогіі, доктар Рычард Маккензі.

Найстрашнейшыя фільмы: высновы навукоўцаў

Акрамя асноўнага эксперыменту, даследчыкі склалі рэйтынг фільмаў паводле ступені пужальнага эфекту і колькасці спаленых калорый:

«Ззянне» Стэнлі Кубрыка (у сярэднім дапамагаў спаліць 184 калорыі);

«Сківіцы» (161 калорыя);

«Экзарцыст» (158 калорый).

Таксама ў спіс увайшлі: «Піла» (133 калорыі), «Кашмар на вуліцы Вязоў» (118) і «Тэхаская разня бензапілой» (107).