Беспілотнікі СБУ ўразілі НПЗ «Башнафта» ў Уфе

• 11.10.2025, 14:28

Прадпрыемства знаходзіцца за 1400 км ад Украіны.

Дальнабойныя беспілотнікі СБУ гэтым ранкам учынілі «хлопак» на нафтаперапрацоўчым заводзе «Башнафта-УНПЗ». Ён размешчаны ў горадзе Уфа, Рэспубліка Башкартастан, за 1400 кіламетраў ад Украіны.

Пра гэта паведамляе РБК-Украіна са спасылкай на крыніцы.

Падкрэсліваецца, што Уфа з'яўляецца адным з найбуйнейшых нафтаперапрацоўчых цэнтраў РФ і забяспечвае палівам і гаруча-змазачнымі матэрыяламі ўзброеныя сілы ворага.

Пасля выбухаў на тэрыторыі «Башнафта-УНПЗ» туды пачала ехаць пажарная тэхніка, а над самім заводам падымаецца слуп чорнага дыму. Паводле папярэдняй інфармацыі, пасля ўдару беспілотнікаў ЦСО «А» СБУ ўзгаранне адбылося ў раёне ўстаноўкі для перапрацоўкі сыравой нафты ЭЛОУ-АВТ-6.

«Гэта ўжо трэці за апошні месяц дыпстрайк СБУ ў Башкартастане — за 1400 кіламетраў ад Украіны. Такія ўдары дэманструюць, што ў глыбокім тыле РФ няма бяспечных месцаў. СБУ можа дацягнуцца да любых аб’ектаў на тэрыторыі ворага, якія працуюць на вайну супраць Украіны», — паведаміла інфармаваная крыніца.