Беспілотнікі атакавалі вайсковыя аб’екты РФ паблізу Валгаграда

• 11.10.2025, 9:22

Было чутна ад 5 да 7 магутных выбухаў.

Расійскі горад Валгаград у ноч на 11 кастрычніка атакавалі невядомыя беспілотнікі.

Аб гэтым паведамляе РБК-Украіна са спасылкай на расійскія СМІ.

Каля другой гадзіны ночы жыхары горада паведамлялі, што ў наваколлі было чутна ад 5 да 7 магутных выбухаў.

Відавочцы таксама пісалі, што да гэтага чулі характэрны гул беспілотнікаў.

Да гэтага ў Валгаградскім аэрапорце ўвялі часовыя абмежаванні. Рэйсы затрымліваліся або накіроўваліся ў іншыя гарады.

Пазней губернатар Валгаградскай вобласці Андрэй Бачараў паведаміў, што масіраваная атака беспілотных лятальных апаратаў на тэрыторыю вобласці «адбіваецца сіламі Міністэрства абароны Расійскай Федэрацыі».

Атака дронаў на НПЗ у Валгаградзе

Беспілотнікі перыядычна атакуюць НПЗ у Валгаградзе — ООО «Лукойл-Волгограднефтепереработка».

Штогод на гэтым аб’екце РФ перапрацоўваецца больш за 15 млн тон нафты, што складае амаль 6% усёй перапрацоўкі ў краіне. У прыватнасці, завод выпускае дызель, бензін і авіяцыйнае паліва, якія з’яўляюцца крытычна важнымі для забеспячэння арміі РФ.