ЗСУ адбілі масіраваную атаку акупантаў каля Пакроўска

• 11.10.2025, 8:17

Украінскія дэсантнікі паказалі відэа баёў.

Дэсантна-штурмавыя войскі разам з іншымі падраздзяленнямі Сіл абароны Украіны адбілі масіраваную атаку расійскіх акупантаў каля Уладзіміраўкі на Пакроўскім напрамку ў Данецкай вобласці.

Пра гэта ў Facebook паведаміла Камандаванне ДШВ ЗСУ.

Паводле даных ДШВ ЗСУ, камандаванне акупацыйных войскаў РФ накіравала тры брыгады і адзін полк марской пяхоты на штурм населеных пунктаў Уладзіміраўка і Сафіеўка ў раёне Пакроўска.

Падчас атакі праціўнік выкарыстоўваў 6 танкаў, амаль 40 баявых браніраваных машын і больш за 40 адзінак мотатэхнікі. У штурме пазіцый ЗСУ ўдзельнічалі некалькі соцень акупантаў.

Расійскія акупанты ішлі ў атаку хваля за хваляй. У першым эшалоне былі мабільныя групы на матацыклах. За імі рухаліся танкі і баявыя машыны з дэсантам. Байцы ЗСУ загадзя падрыхтавалі рубяжы абароны.

У адбіцці варожай атакі ўдзельнічалі групоўка ДШВ ЗСУ, 1-ы корпус Нацгвардыі Украіны «Азоў», а таксама сумежныя падраздзяленні.

Асабліва лютыя баі былі ў раёне Уладзіміраўкі. Там высадзілася каля трыццаці акупантаў, але іх у выніку знішчылі. У выніку масіраваную атаку ворага адбілі. Украінскія байцы знішчылі 3 танкі, 13 ББМ і 41 матацыкл. Страты ворага ў жывой сіле — каля 100 чалавек.