«Атруцілася сушы з выклікам хуткай дапамогі і тэмпературай 39»

• 10.10.2025, 15:29

Завядзенне праверыла санстанцыя.

Мінчанцы Анастасіі Лісаевай давялося выклікаць хуткую пасля таго, як яна пакаштавала сушы з дастаўкі Kanso. Сваёй гісторыяй дзяўчына падзялілася ў сацсетцы Threads. Пасля гэтага завядзенне праверыла санслужба, піша «Зеркало».

«Атруцілася сушы ў нас у Мінску, моцна, з выклікам хуткай дапамогі і тэмпературай 39. Здаецца, прыстойная дастаўка. Размаўляла сёння з дырэктаркай. Яна сказала: «Віна дакладна не наша, ніхто раней не скардзіўся, а прадукты свежыя», — напісала Анастасія.

Мінчанка адзначыла, што «з-за гэтага атручвання не змагла працаваць», а паколькі яна працуе на сябе, то фінансавых страт ёй ніхто не кампенсуе.

«Хто-небудзь сутыкаўся з падобнай сітуацыяй увогуле? Як яе вырашалі або як бы вырашылі, калі раптам такое здарылася?» — паскардзілася ў Threads дзяўчына на сушы-бар Kanso.by (вул. П. Мсціслаўца, 8.).

Пост набраў больш за 400 каментарыяў. Некаторыя карыстальнікі засумняваліся, што прычынай атручвання сталі сушы. На публікацыю мінчанкі адрэагавалі і лекары-гігіеністы. Яны праверылі завядзенне.

Высветлілася, што з 26 верасня 2025 г. па 7 кастрычніка 2025 г. не зарэгістраваныя выпадкі інфекцыйных захворванняў, звязаных са спажываннем прадукцыі ООО «Гарантия вкуса», піша дзяржагентства «Минск-Новости».

Разам з тым спецыялісты Цэнтра гігіены і эпідэміялогіі Першамайскага раёна Мінска правялі мерапрыемства тэхнічнага (тэхналагічнага, праверачнага) характару.

— Дзейнасць сушы-бару прыпынена з 7 кастрычніка да ўстаранення парушэнняў. Таксама адабраны пробы харчовай прадукцыі для лабараторнага даследавання на мікрабіялагічныя паказчыкі бяспекі, пра вынікі якога стане вядома пазней, — патлумачылі ў санітарнай службе.