Прынцэса Ганна здзейсніла неабвешчаны візіт ва Украіну

• 1.10.2025, 9:58

Сталі вядомыя падрабязнасці.

Прынцэса Вялікабрытаніі Ганна з неабвешчаным візітам наведала Кіеў. Такім чынам яна падтрымала ўкраінскіх дзяцей, якія пацярпелі ад расійскай агрэсіі.

Пра гэта паведамляюць BBC і Sky News.

Паводле СМІ, падчас свайго візіту Ганна сустрэлася з прэзідэнтам Уладзімірам Зяленскім і першай лэдзі. Яны ўшанавалі памяць загінулых дзяцей і пагутарылі з падлеткамі, якіх удалося вярнуць з расійскай дэпартацыі.

У той жа час у Букінгемскім палацы ўдакладнілі, што галоўнай мэтай паездкі прынцэсы было прыцягненне ўвагі да «траўматычнага досведу дзяцей, якія жывуць на лініі фронту».

У Кіеве яна наведала Нацыянальны музей гісторыі Украіны ў Другой сусветнай вайне, Міхайлаўскі залатаверхі сабор, дзе ўшанавала памяць маленькіх украінцаў, чые жыцці абарвала Расія.

Прынцэса Ганна таксама наведала Цэнтр абароны правоў дзіцяці. Там яна пагутарыла з падлеткамі, якіх расійскія вайскоўцы пахітылі з іх дамоў, але якіх пазней удалося вярнуць на радзіму. Ганна падзякавала супрацоўнікам цэнтра, якія «нястомна працуюць», каб уз’яднаць як мага больш дзяцей са сваімі сем’ямі.