Рассельгаснагляд узмацніў кантроль прадукцыі адразу шасці беларускіх прадпрыемстваў

• 1.08.2024, 21:18

У каўбасе і ялавічыне знайшлі дыклафенак.

Рассельгаснагляд узмацніў кантроль прадукцыі адразу шасці беларускіх прадпрыемстваў, яшчэ аднаму часова забаранілі пастаўляць тавар на расейскі рынак, паведамляе прэс-служба ўстановы.

У каўбасе ад ТАА «Пухавічымясапрадукт» і ў ялавічыне «Ваўкавыскага мясакамбіната» спецыялісты знайшлі дыклафенак.

У каўбасных вырабах «Глыбоцкага мясакамбіната» знойдзены азітраміцын, а ў паўфабрыкатах з ялавічыны ад «Бабруйскага мясакамбіната» – лістэрый. У каўбасе філіяла «ЮНІМІТ» ААТ «Смалявічы Бройлер» быў клапідол, а ў муцэ кармавой з птушкі ад прадпрыемства «САРЫЯ» – ДНК буйной рагатай жывёлы.

У ялавічыне кааператыўна-гандлёвага ўнітарнага прадпрыемства «Полацкі рынак г. Віцебска» выявілі мікраарганізмы. Гэтае парушэнне паўторнае, таму пастаўкі гэтай прадукцыі на расейскі рынак часова абмежавалі.