Баец УСУ проста на хаду патушыў свой падпалены танк

• 11.07.2024, 12:45

Неймаверны прыклад мужнасці і адвагі.

Камандзір аднаго з экіпажаў танкавай роты 214-га асобнага спецыяльнага батальёна УСУ паказаў неймаверны прыклад мужнасці і адвагі на полі бою.

Як расказаў журналіст Юрый Бутусаў, які апублікаваў у сябе ў Telegram-канале адпаведнае відэа, падчас выканання баявога задання па зачыстцы пасадкі бронетэхніка трапіла пад удар расейскага беспілотніка-камікадзэ.

На апублікаваных кадрах відаць, што ў выніку трапляння адбылося ўзгаранне, аднак украінскі баец, нягледзячы на вялізную рызыку для свайго жыцця, адразу ж выскачыў вонкі і пачаў змагацца з полымем, якое ахапіла танк, чым, магчыма, моцна засмуціў акупантаў.

«Узнікла ўзгаранне як звонку, так і ўнутры. Воін не разгубіўся ні на секунду, схапіў вогнетушыцелі, вылез на браню і проста на хаду справіўся з полымем, захаваў жыццё і здароўе экіпажу, адкаціў танк на нашы пазіцыі ў прыдатным для працы стане», - адзначыў Бутусаў.