«Вось ляціць»: БПЛА атакавалі важны вайсковы аб'ект РФ у Каменск-Шахцінскім

• 15.06.2024, 10:28

Расейскія ракеты могуць застацца без паліва.

Уночы 15 чэрвеня ў Растоўскай вобласці было неспакойна. Ударныя дроны Украіны атакавалі цэль у буйным індустрыяльным горадзе Каменск-Шахцінскі, піша Диалог.UA.

Міністэрства абароны Расеі раніцай дало справаздачу пра нібыта перахопленыя над Растоўскай вобласцю 3 украінскія БПЛА. Губернатар Васіль Голубеў таксама сцвярджае, што нібыта ўсё збіта.

Аднак пры гэтым ён паведаміў аб нейкім "падзенні абломкаў на тэрыторыю прадпрыемства" і пашкоджанні шклення. Што за аб'ект быў пашкоджаны, кіраўнік Растоўшчыны не паведаміў.

Аднак вядома, што ў расейскім Каменск-Шахцінскім знаходзіцца вельмі цікавы камбінат "Каменскі", які задзейнічаны ў вытворчасці паліва для ракетных рухавікоў.

Сітуацыю пракаментаваў расейскі блогер Анатоль Несміян (Эль Мюрыд).

«Уначы беспілотнікі атакавалі Каменск-Шахцінскі - гэта дастаткова буйны індустрыяльны горад і чыгуначны вузел. Улады звыкла заявілі, што ўсе беспілотнікі збітыя, ахвяр няма, пашкоджаны толькі нежылыя будынкі. Фармулёўка вельмі расплывістая, бо збіць беспілотнік можа і той самы нежылы будынак, куды ён у выніку прылятае», - адзначыў экспэрт.