Еўракамісія атрымае права спыняць пастаўкі газу з Беларусі

• 21.05.2024, 16:17

На перыяд да аднаго года з магчымасцю падаўжэння.

Еўракамісія пасля 31 снежня 2025 года атрымае права абмяжоўваць пастаўкі газу, у тым ліку ЗПГ, з Беларусі і Расеі на перыяд да аднаго года з магчымасцю падаўжэння. Еўрарада сёння фармальна зацвердзіла рэформу газавага рынку.

Забарона на пастаўкі можа быць абумоўленая «абаронай ключавых інтарэсаў бяспекі або бяспекі забеспячэння ЕЗ або дзяржавы-чальца». Аднак пры гэтым яна не павінна парушаць бяспеку забеспячэння газам еўрапейскага рынку агулам і асобных дзяржаў-чальцоў, не парушаць абавязацельствы перад трэцімі краінамі.

Дакумент набудзе моц праз шэсць месяцаў пасля апублікавання. Краіны ЕЗ будуць мець два гады на прывядзенне свайго заканадаўства ў адпаведнасць з ім.

Дакумент таксама змяшчае захады па развіццю рынку вадароду, адмове ад выкапнёвага газу, кіраванню супольным попытам і г.д.