У акупаваным Дакучаеўску ліквідаваны высокапастаўлены калабарант

• 10.03.2024, 19:35

Машыну здрадніка Украіны падарвалі.

У нядзелю, 10 сакавіка, акупаваны Дакучаеўск ускалыхнуў магутны выбух. У сваёй машыне быў узарваны сілавік-здраднік Ігар Цыфераў. Кадры з месца здарэння даступныя на Telegram-канале «Украіна 365».

Мяркуючы з відэа, машына ўзарвалася проста на паркоўцы каля шматкватэрнага дома. Верагодна, падрыў здарыўся ў момант запальвання – аўто нават не паспела крануцца.

Эпіцэнтр выбуху прыпаў на крэсла кіроўцы. Меркавана, менавіта пад ім была ўстаноўленая выбухоўка. Кіроўца атрымаў траўмы, несумяшчальныя з жыццём.

Вядома, што загінулы – гэта здраднік Ігар Цыфераў, які працаваў у так званым «міністэрстве дзяржбяспекі» («МДБ») акупаванага Данбаса. Гэта падкантрольная Маскве спецслужба, якая займалася 10 гадоў тэрорам на тэрыторыях так званых «Л/ДНР».

На гэты момант ніхто не ўзяў на сябе адказнасць за ліквідацыю калабаранта. Гэта мог быць як украінскі «МАССАД», так і паплечнікі нябожчыка, з якімі ён нешта не падзяліў.