Запарожская АЭС трэцім разам за месяц апынулася на мяжы блэкаўту

• 30.11.2024, 14:15

Акупанты стварылі пагрозу для радыяцыйнай бяспекі.

Запарожская атамная станцыя ў выніку варожага абстрэлу ноччу 30 лістапада страціла сілкаванне адной з дзвюх вонкавых ліній электраперадачы, якія злучаюць часова акупаваную ЗАЭС з аб'яднанай энэргасістэмай Украіны.

Пра гэта паведамляе УНІАН са спасылкай на міністэрства энэргетыкі Украіны. Адзначаецца, што зараз станцыя сілкуецца толькі адной лініяй электраперадачы.

У выпадку адключэння станцыі ад вонкавага сілкавання на Запарожскай АЭС адбудзецца чарговы поўны блэкаўт, які стварае пагрозу для радыяцыйнай бяспекі.

У ведамстве падкрэслілі:

«Украінскія энэргетыкі пачнуць аднаўленне працы лініі, як толькі дазволіць сітуацыя з бяспекай».