Кіроўца ў Гародні прыдумаў хітры спосаб, як вызваліць месца для паркоўкі

• 26.01.2024, 16:03

Пры дапамозе ДАІ.

Гарадзенец карыстаецца ДАІ, каб вызваляць сабе месца для паркоўкі ў двары, паведамляе «АвтоГродно».

Яго хітры спосаб раскрыў адзін з суседзяў. Ён растлумачыў, што ў дварах на вуліцы Суворава вельмі мала месца і прыпаркавацца складана. Пры гэтым там нерухома на адным і тым жа месцы ўсю зіму стаіць FIAT, а ўздоўж дарогі і бокам да яго заўсёды ставіць сваё аўто кіроўца BMW.

На днях, убачыўшы, што месца поруч FIAT вольнае, сусед надумаў прыпаркаваць такім жа спосабам свой VW Golf. Аднак праз некалькі гадзін яму патэлефанавалі з ДАІ і сказалі, каб ён тэрмінова прыбраў аўтамабіль, бо кіроўца FIAT не можа выехаць.

Мужчыну давялося перапаркаваць свой VW Golf. Пры гэтым ён заўважыў, што FIAT нікуды так і не з'ехаў. Аднак побач з ім паставіў сваё аўто кіроўца BMW.

Гаспадар VW Golf зразумеў, што аўтамабілямі BMW і FIAT валодае адзін і той жа чалавек, таму, натуральна, на BMW у ДАІ ён не скардзіцца.

«Гэта значыць, уладальнік BMW, проста выкарыстоўваючы ДАІ, вызваліў для сябе месца на стаянцы. Вельмі зручна», - абурыўся ўладальнік VW Golf.

У ДАІ пракаментавалі сітуацыю, адзначыўшы, што калі FIAT стаіць паўгода і не выкарыстоўваецца (колы спушчаныя, карозія, няма часткі элементаў аўтамабіля), то жыхары могуць паскардзіцца ў свой УЖРЭП, тады аўтамабіль прыбяруць. Калі BMW стаіць на праездзе, можна патэлефанаваць у дзяжурную частку ДАІ, тады ў сітуацыі будуць разбірацца інспектары.