У Беларусь прывязуць люксавыя кітайскія электрапазадарожнікі

• 10.01.2024, 20:56

Аўто будуць прадаваць у дзвюх версіях.

У Беларусь прыходзяць люксавыя кітайскія электрапазадарожнікі M-HERO. Пра гэта паведаміла кампанія «Аўтапрамсэрвіс», якая стала афіцыйным імпарцёрам брэнду.

M-HERO належыць канцэрну Dongfeng. Рамны аўтамабіль мае брутальны дызайн і вялікія габарыты: даўжыня – 5066 мм, шырыня – 1934 мм, вышыня – 2080 мм.

У Беларусі будуць прадаваць пазадарожнікі дзвюх версій. Адна – цалкам электрычная з батарэяй 142 квт/г. Іншая – EVR, якая адносіцца да класу паслядоўных гібрыдаў і абсталяваная рухавіком унутранага згарання магутнасцю 190 к. с, які не злучаны з кіроўнымі коламі і працуе як генератар, зараджаючы батарэю ёмістасцю 65 квт/г.

«Камбінаваны запас ходу (версіі EVR – Заўв. рэд.) дасягае 1026 км аўтаномнага прабегу паводле методыкі CLTC (методыка ацэнкі запасу ходу распаўсюджаная ў Кітаі – Заўв. рэд.)», – паведамілі ў «Аўтапрамсэрвісе».

Уладальнікі пазадарожнікаў з мадыфікацыяй EVR могуць у любы момант заліць паліва ў бак аб'ёмам 84 літры, для наступнай падзарадкі батарэі ад рухавіка-генератара. Ад 0 да 100 км/г аўтамабіль гэтай камплектацыі разганяецца за 6 сек.

M-HERO у Беларусі будзе прадавацца ў дылерскай сетцы Voyah. Першыя пазадарожнікі ўжо прыбылі ў Беларусь і хутка будуць прэзентаваныя публіцы. Кошты абяцаюць абвясціць «найбліжэйшым часам».