У Беларусі скасавалі дзяржаўную манаполію на крамы Duty Free

• 10.01.2024, 14:26

Каму дазволілі прадаваць алкаголь?

Аляксандр Лукашэнка падпісаў папраўкі ў закон, паводле якіх з ліпеня гэтага года ў Беларусі памяняюцца некаторыя правілы на рынку спіртнога. Адная з галоўных навін - у скасаванні дзяржаўнай манаполіі і на продаж алкаголю ў бязмытных крамах (Duty Free).

Папраўкі набудуць моц у ліпені 2024 года, вынікае з закона №345-3, апублікаванага на Нацыянальным прававым інтэрнэт-партале 10 студзеня.

З дзейных норм, дзяржава дэлегуе права прадаваць спіртное праз Duty Free. Цяпер гэтым займаюцца дзяржкампанія «Дыпмаркет» з сістэмы Кіраўніцтва спраў Лукашэнкі і тры прыватныя арганізацыі: «БЕЛАМАРКЕТ Duty Free», «Беламаркет ХЕЛЕНА ВАЛЕРЫ» і «МаркетЛіга».

Новыя ж правілы дазволяць працаваць у гэтай сферы ўсім кампаніям, у якіх статутны фонд не менш за 24 тысячы базавых адзінак (цяпер гэта – 960 тысяч рублёў).

Іншая змена - паслабленні ў імпарце алкагольных напояў. Напрыклад, выключнае права дзяржавы не будзе распаўсюджвацца на ўвоз алкаголю для перапрацоўкі, але імпартаваць для гэтых мэт можна ў сасудах ёмістасцю больш за два літры.

Ёсць і іншыя змены. Напрыклад, калі раней Міністэрства антыманапольнага рэгулявання і гандлю зацвярджала спіс кампаній, якім дазволены імпарт спіртнога, то з ліпеня гэта будзе пералік алкагольных напояў. Напрыклад, пэўныя віды шампанскага, каньяку, рому, джыну, віскі і іншых напояў.