Лукашысты пачалі вайну з польскай мовай

• 10.01.2024, 12:01

Кіраўнікоў моўных курсаў затрымліваюць.

Сілавікі закрылі ў Беларусі блізу дзесяць камерцыйных устаноў, дзе вывучалі польскую мову. Кіраўнікоў моўных курсаў затрымліваюць, ад супрацоўнікаў патрабуюць спісы выкладчыкаў і студэнтаў, якім пагражае пераслед. Асабліва сілавікі цікавяцца ўладальнікамі "карты паляка", паведамляе Беларуская рэдакцыя Польскага радыё.

Раней паведамлялася аб закрыцці школы Polskipro, куды сілавікі прыйшлі 21 снежня 2023 года. У гэты ж дзень прайшоў ператрус у моўнай школе "Пан Прафесар", якая таксама абвясціла аб сваім закрыцці пасля дзевяці гадоў працы.

Рэжым Лукашэнкі з ліпеня 2023 года патрабуе, каб грамадзяне паведамлялі аб наяўнасці дазволу на жыхарства, пашпарты іншай краіны і іншых дакументаў, выдадзеных іншымі дзяржавамі. Дзяржаўным службоўцам увогуле не дазволена мець “карту паляка”.