Стала вядома, як развівалася хвароба Кадырава

• 27.09.2023, 9:46

Яна пачалася ў траўні 2020 года.

Крыніца расейскага тэлеграм-канала ВЧК-ОГПУ расказала, як развівалася хвароба Рамзана Кадырава.

Пачалася яна, калі ў траўні 2020 года Кадыраў быў шпіталізаваны ў Маскве з COVID. Ужо падчас лячэння яму давялося рабіць гемадыяліз, бо хвароба «ўдарыла» па нырках.

Пасля выпісвання ў Кадырава з'явілася дыхавіца і захаваліся праблемы з ныркамі.

Міністр аховы здароўя Чачэніі Эльхан Сулейманаў, які выконваў функцыі лекара сям'і Кадыравых, два гады з пераменным поспехам змагаўся з гэтымі посткавіднымі наступствамі, а ў 2022 годзе пачаў рабіць Кадыраву ін'екцыі.

Аднак пасля гэтага стан Кадырава моцна пагоршыўся. Гэта адбылося імкліва.

Сам Сулейманаў падчас кансультацый з калегамі з Масквы і Нямеччыны звязваў здарэнне з індывідуальнай непераноснасцю прэпарата. Калегі не былі ў гэтым упэўненыя і меркавалі, што пагаршэнне стану здароўя можа быць і не звязанае з ін'екцыямі.

У сваю чаргу, у асяроддзі Кадырава група асоб актыўна «прасоўвала» версію аб атручванні. Вядома, што ў гэтай непрыемнай сітуацыі за Сулейманава сына прасіла маці Рамзана Кадырава, якую Сулейманаў "падняў на ногі" падчас цяжкай хваробы.

Таксама на гэты момант вядома, што ў кастрычніку 2022 года ўсім сябрам Сулейманава дайшлі праз тэлефон або ў сацыяльных сетках аднолькавыя паведамленні накшталт: «Я з'язджаю з сям'ёй у Баку, прашу не турбаваць».

ВЧК-ОГПУ гутарыў з дзясяткам сяброў Сулейманава, і ніхто з тых часоў яго не бачыў, не чуў — на ўсе паведамленні ён не адказваў.

Пасля публікацый ВЧК-ОГПУ аб знікненні Сулейманава была зробленая спроба апублікаваць у сацыяльных сетках архіўныя кадры з ім і выдаць іх за свежыя.

Сябры кінуліся пісаць у сацыяльных сетках "Сулейманаву", але хутка зразумелі, што адказвае ім іншы чалавек, які выдае сябе за Эльхана.

Тады супрацоўніца агенцтва Спутнік (РІА Новості) апублікавала «скрын» інтэрвію з Сулейманавым (пасля з'явіўся ідэнтычны скрын з «інтэрвію Кадырава»).

Само "відэаінтэрвію" так і не было паказанае, быў апублікаваны "тэставы варыянт", відавочна напісаны прэсавай службай Кадырава.

Замест відэаінтэрвію пазней паказалі спецыяльна зняты ролік з Сулейманавым, дзе ён, пазіраючы ў бакі, з нейкага памяшкання сказаў, што з ім усё ладам.

З сябрамі Сулейманаў на сувязь так і не выйшаў, ягонае месцазнаходжанне па-ранейшаму невядомае.