У пятніцу кіроўцы змогуць праехацца ў менскім транспарце задарма

• 21.09.2023, 11:07

А на арэнду ровараў дадуць збаўку.

22 верасня жыхарам Менска дазволяць ездзіць у гарадскім транспарце, у тым ліку метро, без аплаты праезду пры паказе пасведчання кіроўцы і пасведчання аб рэгістрацыі транспарту, паведаміў Менскі гарвыканкам. Робіцца гэта ў межах акцыі "Дзень без аўтамабіля".

Традыцыйна ў Менску ў гэты дзень пройдзе і акцыя "На працу на ровары". Будуць арганізаваныя "энэргетычныя і інфармацыйныя пункты" каля галоўнага ўваходу ў Цэнтральны батанічны сад, каля "Мінск-Арэны" (з боку роварнай дарожкі), на пр.Дзяржынскага, 13 (паркінг), на пр.Партызанскі, 30.

"Тут раварысты або іншыя ўдзельнікі руху, якія выкарыстоўваюць экалагічны транспарт, змогуць пачаставацца садавіной і атрымаць інфармацыйныя матэрыялы аб тыдні мабільнасці і дні без аўтамабіля", — паведаміў Менскі гарвыканкам.

Таксама ў гэты дзень дадуць збаўку на арэнду ровараў дзвюх кампаній. А ў мікрараёнах Менска пройдуць роварныя заезды.

Акцыя "Дзень без аўтамабіля" праводзіцца рэгулярна пачынаючы з 2008 года.