«Пасядзела на капоце DeSoto і, здаецца, занадта захапілася»
- 11.09.2023, 12:44
Знайшлася мянчанка, якая зладзіла фотасэсію на капоце рэтракара і пакінула ўвагнутасць.
У мінулую пятніцу ў Менску адбыўся незвычайны выпадак: дзяўчына ў кацінай масцы дзеля эфектнага здымка села на капот 75-гадовага рэтракара DeSoto і пакінула вялікую ўвагнутасць. Гаспадар самахода прыняўся за пошукі гераіні фотасэсіі, неўзабаве яна сама выйшла на сувязь. З мянчанкай на імя Наталля паразмаўляў Onlíner.
Нагадаем, мянчук Кірыл, уладальнік рэдкага 75-гадовага рэтракара DeSoto, знайшоў на капоце аўто вялізную ўвагнутасць. Ён вывучыў запісы камер знадворнага назірання і высветліў, як усё адбылося:
- На аўтамабілі пасядзелі літаральна за пару хвілін да майго выхаду. Гэта была дзяўчына ў масцы, якую я бачыў у тую раніцу падчас фотасэсіі ў арцы суседняга будынка. Як высветлілася, яна і фатограф знялі некалькі сюжэтаў у розных паставах на капоце майго самахода. Я звярнуўся ў міліцыю з заявай.
Пасля публікацыі нататкі аб пошуках дзяўчыны, якая пакінула ўвагнутасць на вінтажным аўтамабілі, аказалася і гераіня фотасэсіі. Прынамсі, са слоў уладальніка рарытэту, яна сама прызналася ў паведамленні:
- Фота ў профілі няма, пераканацца ў гэтым дакладна я не магу. Але напісала, што гэта была яна. Я заўсёды стаўлюся да асабовых звестак людзей вельмі асцярожна. Таму прапанаваў ёй тэлефанаваць у дзяжурную частку Ленінскага РУУС або 102, каб ідэнтыфікаваць сябе.
Onlíner затэлефанаваў дзяўчыне, якая прадставілася як Наталля:
- Я сапраўды села на капот самахода для здымкаў, пра што, вядома, шкадую. Мы ішлі з дзяўчынай па вуліцы і ўбачылі рэтрасамаход. Калі шчыра, думала, ён няспраўны. Меркавала, што савецкі, бо ў аўтамабілях зусім не цямлю. Была асацыяцыя са спісаным самалётам, які ставяць у грамадскім месцы і па якім поўзаюць дзеці. Я здагадвалася, што ён некаму належыць. Але мы, здаецца, занадта захапіліся. Ясна, што рабіць так нельга. Потым мы ўбачылі Кірылу, які падышоў да самаходу, ён убачыў нас. Але ў той момант я чамусьці не наважылася падысці.
Наталля дадала, што пасля публікацыі аб вышуку сапраўды звязалася з Кірылам, які і сапраўды параіў тэлефанаваць на нумар 102:
- Я так і зрабіла ў суботу. Назвала сябе, прызналася. Там сказалі, што ператэлефануюць у панядзелак. Паралельна я прапанавала Кірылу паехаць да майстра, які змог бы зліквідаваць увагнутасць — за мой кошт. Бо я маю сумленне. Але ўладальнік адмовіўся, спаслаўся на занятасць. Вядома, я не хацела пашкодзіць аўтамабіль.