У Расеі ад атручэння сідрам памерлі 18 чалавек

• 5.06.2023, 18:17

У лякарнях застаюцца яшчэ 19 пацярпелых.

Ахвярамі масавага атручэння сурагатным сідрам «Містэр сідр» сталі 18 расейцаў. 16 з іх памерлі ва Ульянаўскай вобласці, паведаміў губернатар Аляксей Рускіх.

У рэгіянальных лякарнях застаюцца яшчэ 19 пацярпелых. Са слоў губернатара, «за жыццё кожнага з іх змагаюцца лекары». Сярод тых, хто атруціўся, непаўналетняя дзяўчына. Рускіх запатрабаваў ад кіраўнікоў муніцыпалітэтаў арганізаваць рэйды народных дружын супольна з паліцыяй па ўсіх пунктах продажу алкаголю, пачынаючы з так званых «разліваек».

Яшчэ дзве жанчыны памерлі ў Новакуйбышаўску Самарскай вобласці. Таксама два чалавекі - юнак і жанчына - атрымалі атручэнне ва Удмуртыі. Яны ў крытычным стане.

Пасля гэтага ў крамах Іжэўска канфіскавалі больш за 100 літраў сурагатнага сідру, паведамілі ў МУС. У Самары паліцыянты спынілі фургон з яшчэ 810 літрамі. Небяспечны напой адправяць на праверку: раней у іншых узорах быў знойдзены метанол.

Следчыя распачалі крымінальную справу аб наданні паслуг, якія не адпавядаюць патрабаванням бяспекі, якія пацягнулі па неасцярожнасці смерць дзвюх або больш асоб (частка 3 артыкула 238 КК). Паводле інфармацыі аператыўнікаў, усё пацярпелыя пілі напой «Містэр Сідр», набыты ў крамах «Тэрыторыя піва», які пастаўляла ТАА «Андзі» з Краснаглінскага раёна Самарскай вобласці.

Уладальніка прадпрыемства ўжо затрымалі і дапыталі. Яму пагражае да 10 гадоў пазбаўлення волі. На тэрыторыі вытворчасці сідру таксама пачаліся следчыя дзеянні.

Кіраўніца Расспажыўнагляду Ганна Папова даручыла рэгіянальным управам ведамства знайсці і выключыць з продажу алкагольны напой «Містэр сідр». Услед за гэтым у Расалкагольрэгуляванні паведамілі, што адгрузкі і пастаўкі прадукцыі, якая стала прычынай масавага атручэння, заблакаваныя на ўсёй тэрыторыі краіны.

Праз вайну ва Украіне і санкцыі Расею пакінула другая найбуйнейшая піваварная кампанія ў свеце - Heineken. Апроч піва яна вырабляла сідр пад брэндамі Sommersby і Strongbow. У красавіку гэтага года Heineken звярнулася да рэгулятара па дазвол на продаж свайго бізнэсу ў Расеі, дзе ў яе сем піваварных заводаў, ацаніўшы меркаваныя страты на $320 млн.