Катар і «Талібан» правялі сакрэтныя перамовы

• 31.05.2023, 17:23

Сустрэча прайшла ў афганскім Кандагары.

Прэм'ер-міністр Катару Мухамед бін Абдулрахман Аль-Тані правёў таемныя перамовы з вярхоўным лідарам «Талібана» Хайбатулам Ахундзадай для ўрэгулявання напружанасці з міжнароднай супольнасцю

Пра гэта паведамляе Reuters.

Адзначана, што сустрэча, якая адбылася 12 траўня ў афганскім горадзе Кандагары, сведчыць аб гатоўнасці кіраўнікоў Афганістана абмеркаваць шляхі спынення ізаляцыі рэжыму. Гэта першыя перамовы талібаў з замежным лідарам.

Паводле інфармацыі ананімнага суразмоўцы Reuters, бакі, напрыклад, абмеркавалі неабходнасць пакласці канец забаронам «Талібана» на адукацыю для дзяўчат і працаўладкаванне жанчын.

Адзначаецца, што адміністрацыя прэзідэнта ЗША Джо Байдэна была праінфармаваная аб перамовах і «каардынуе ўсе пытанні, якія ўзнімаліся на сустрэчы», уключаючы далейшы дыялог з «Талібанам».

«Сустрэча з'яўляецца дыпламатычным поспехам для Катару, які крытыкаваў абмежаванні «Талібана» ў дачыненні да жанчын, адначасова выкарыстоўваючы даўнія сувязі з ісламісцкім рухам, каб падштурхнуць міжнародную супольнасць да глыбейшага ўзаемадзеяння з Кабулам», - піша Reuters.