Кадыраў заявіў аб пачатку наступу ягоных войскаў у «ДНР»

• 31.05.2023, 11:03

Кіраўнік Чачэніі назваў Данбас сваёй «зонай адказнасці».

Кіраўнік Чачэнскай рэспублікі Рамзан Кадыраў анансаваў наступ сваіх ваеўнікоў на Данбасе. Ён сцвярджае, што байцы палка "Ахмат" атрымалі загад "прасоўвацца" наперад.

Аб гэтым Кадыраў піша ў тэлеграме, паведамляе Цензор.НЕТ.

Паводле ягоных слоў, акупаваныя тэрыторыі Данбаса стануць зонай адказнасці "кадыраўцаў".

«Згодна з загадам, байцы чачэнскіх падраздзяленняў маюць пачаць актыўныя баявыя дзеянні і вызваліць (захапіць - Рэдакцыя) цэлы шэраг паселішчаў. Зрэшты, вось ужо некалькі дзён ідзе першы этап - камандны штаб падраздзяленняў распрацоўвае планы прасоўвання і вызвалення паселішчаў, атрымлівае новыя выведныя звесткі», - напісаў Кадыраў.

Ён паведаміў, што дэпутат Дзяржаўнай думы РФ Адам Дэлімханаў "сустрэўся з камандзірамі, зонай адказнасці якіх з'яўляецца Мар'інскі кірунак". Туды ўжо нібыта перакінулі сілы спецвойскаў "Ахмат" і палка "Поўнач-Ахмат", камандаванне якімі будзе ажыццяўляць генерал-маёр Апты Алаўдзінаў.

«Кадыраўцы» на вайне супраць Украіны - што вядома

Ваеўнікі верхавода Чачэніі Рамзана Кадырава, якія трымаюць у страху расейцаў, ва Украіне выявіліся толькі Tik-tok войскамі. Яны выявіліся слаба падрыхтаванымі, а іх «перамогі» былі прадстаўленыя пастановачнымі відэа ў сацыяльных сетках.

Акрамя таго, сілы абароны Украіны ліквідуюць "кадыраўцаў", як і астатнія акупацыйныя войскі. 10 траўня стала вядома, што ў адным з паселішчаў часова акупаванага Мелітопальскага раёна група «кадыраўцаў» наважыла зладзіць святочны баль з шашлыком. Бавенне перапынілася праз маштабны ўдар УСУ, у выніку былі зліквідаваныя 23 ваеўнікі.