СМІ падлічылі, колькі F-16 могуць перадаць Украіне краіны Захаду

• 20.05.2023, 16:34

Верагодней за ўсё, Кіеву перададуць самалёты дзве краіны.

Верагодней за ўсё, што краінамі, якія забяспечаць Украіну амерыканскімі знішчальнікамі F-16, будуць Данія і Нідэрланды, гаворыцца ў публікацыі Defense Express.

Журналісты падлічылі, што менавіта гэтыя краіны сярод указаных у "кааліцыі знішчальнікаў", па-першае, маюць на ўзбраенні F-16, а па-другое - ужо абнаўляюць свой авіяцыйны склад пакаленнем F-35. Адпаведна, змогуць даць УСУ самалёты без крытычнай пагрозы ўласнай абараназдольнасці.

У той жа час, адзначаюць журналісты, ЗША і Брытанія таксама выконваюць важную ролю: Лондан пагадзіўся навучаць украінскіх пілотаў, а Вашынгтон можа пакрыць выдаткі на ўзбраенне гэтых машын і запасных частак, якія "лёгка складаюць 50% агульнага цэнніка".

Калі браць толькі рэсурс Нідэрландаў і Даніі, то гаворка можа ісці аб адной-двух эскадрыллях ад Нідэрландаў і адной ад Даніі, гэта значыць усяго ад 24 да 36 машын з наступным паступовым пашырэннем колькасці самалётаў па меры прыбыцця з ЗША новых F-35 і лімітавым агульным паказчыкам у 70 знішчальнікаў F-16, гаворыцца ў матэрыяле.

Колькасць адзінак F-16 можа і змяніцца, калі да ініцыятывы далучацца і іншыя краіны-аператары гэтых знішчальнікаў.