У Дзярждуме РФ пацвердзілі інфармацыю пра хваробу Лукашэнкі

• 14.05.2023, 19:11

Першы намеснік кіраўніка думскага камітэта ў справах СНД заявіў, што ў дыктатара не ковід.

У Дзярждуме пацвердзілі інфармацыю пра хваробу Лукашэнкі. Апошні раз ён з'яўляўся на публіцы 9 траўня: раніцай быў на парадзе на Чырвонай плошчы ў Маскве і паспешна паляцеў зваротна ў Менск. Беларускія медыя звярнулі ўвагу на нездаровы выгляд Лукашэнкі і ягоную няздольнасць дайсці пешшу да Аляксандраўскага саду: на ўскладанне кветак яго павезлі на аўтамабілі.

На ўрачыстасцях у Менску ён не выступіў з прамовай – такога на Дзень Перамогі ніколі не было. Сёння ў Беларусі «адзначаюць» дзень «дзяржсімволікі», і Лукашэнка зноў на людзях не з'явіўся.

Першы намеснік кіраўніка думскага камітэта ў справах СНД Канстанцін Затулін сказаў «Подъёму», што яму вядома, на што хварэе Лукашэнка, але дыягназ не назваў.

«Там нічога такога звышнатуральнага няма, гэта не ковід. Проста чалавек захварэў. Нягледзячы на тое, што чалавек захварэў, палічыў сваім абавязкам прыехаць у Маскву, а потым увечары таго ж дня праводзіў мерапрыемствы ў Менску. Мусіць, мае патрэбу ў пэўным адпачынку – вось і ўсё».

У прэс-службе Лукашэнкі афіцыйна нічога не паведамляюць, а неафіцыйна кажуць пра «працу з дакументамі».

«У іх такая праца, яны так і абавязаныя гаварыць».

Пра стан беларускага дыктатара ці нават пра месца, дзе ён цяпер знаходзіцца, нічога не вядома. З моманту ўрачыстых мерапрыемстваў на 9 траўня ў Маскве і Менску Лукашэнка не з'яўляўся ў публічным полі, ніякіх мерапрыемстваў з ягоным асабістым удзелам не праводзілася. Пры гэтым прэс-служба Лукашэнкі і чыноўнікі маўчаць.

Вядома толькі, што ўчора ўвечары, 13 траўня картэж у суправаджэнні «Стралы» прыехаў на тэрыторыю лечкамісіі – у Рэспубліканскі клінічны медыцынскі цэнтр кіраўніцтва справамі Лукашэнкі. Пад'езды да лякарні былі перакрытыя, а ўздоўж дарог, якія вядуць да яе, выставілі сілавікоў.