Памежнікі Літвы адкрылі агонь па кантрабандыстах з беларускімі цыгарэтамі

• 27.04.2023, 14:38

Здарэнне адбылося 25 красавіка.

У Літве са стралянінай затрымлівалі трох мужчын, якія везлі кантрабандай беларускія цыгарэты, паведамляе прэс-служба памежнікаў.

Здарэнне адбылося 25 красавіка. Недалёка ад чыгункі ў Вілкавішскім раёне памежнікі заўважылі аўтамабіль. Кіроўца праігнараваў сігнал аб спыненні і паспрабаваў схавацца. Памежнікам прыйшлося страляць у паветра і па колах машыны.

У аўтамабілі акрамя кіроўцы выявіліся два пасажыры — мясцовыя жыхары 30 і 45 гадоў. У багажніку аўто памежнікі знайшлі чатыры мяшкі з беларускімі цыгарэтамі Minsk Capital MS. Яшчэ чатыры мяшкі з цыгарэтамі былі знойдзены каля чыгункі.