Чыноўнікі смяюцца з Лукашэнкі?
- 27.04.2023, 10:49
Шэсць гадоў дыктатару абяцаюць, што «вось-вось будзе створаны беларускі электрамабіль».
Думка аб тым, што ў Беларусі з нуля можна стварыць электракар, які пасуне на рынку сусветных аўтавытворцаў, прыйшла ў галаву Аляксандру Лукашэнку. З таго часу чыноўнікі рэгулярна даюць справаздачу аб тым, як блізка яны падышлі да выканання задачы.
UDF распавядае аб новых серыях гэтай трагікамедыі.
Пунктам адліку можна лічыць падзеі шасцігадовай даўніны. 2017-ы год. Тады Лукашэнка пракаціўся на Tesla і паставіў падначаленым задачу стварыць ягоны беларускі аналаг. Палітык з натхненнем глядзеў у будучыню:
«Калі мы можам стварыць і батарэю - назапашвальнік электраэнэргіі - найлепшы ў свеце, чаму мы не ствараем? Што для гэтага трэба? Людзі, грошы, кампетэнцыі? Неадкладна трэба гэта рэалізоўваць».
У тым жа годзе чыноўнікам прадэманстравалі «"эксперыментальны ўзор» першага беларускага электрамабіля на базе Geely.
Больш за тое, кіраўнік Нацыянальнай акадэміі навук Уладзімір Гусакоў заявіў, што ўжо «прапрацоўваюцца варыянты, дзе можна арганізаваць серыйную вытворчасць».
У 2018 годзе Гусакоў заявіў, што дапрацаваны электрамабіль беларускай вытворчасці можа ўбачыць свет ужо да канца года. У 2019-м ён агучыў яшчэ больш смелае абяцанне: беларускія электрамабілі могуць да канца года ўжо паступіць у продаж.
Нічога з гэтага, вядома, не адбылося, але ў 2020 годзе Лукашэнка абазначыў новыя тэрміны - прычым з вялікім запасам.
«Я упэўнены, што ў гэтай пяцігодцы мы будзем мець свой добры электрамабіль. Плюс да таго на Geely з кітайцамі мы будзем вырабляць свой электрычны аўтамабіль. Гэта ўжо рэаліі», - заявіў правадыр краіны.
Абяцанні чыноўнікаў апошняга часу: з іх вынікае, што задача Лукашэнкі нявыкананая
Апошні раз смелае абяцанне наконт вытворчасці беларускіх электрамабіляў прагучала летам 2021 года. Тады першы намеснік міністра прамысловасці Сяргей Гунько заявіў:
«Ёсць дамоўленасці з кампаніяй «Белджы» аб выпуску першай тысячы электрамабіляў. Мы чакаем яе да канца года. Мадэль у нас ужо ёсць, зараз праводзіцца яе тэставанне. На сайце кампаніі прымаюцца замовы».
Натуральна, у акрэслены тэрмін нічога не адбылося. Чыноўнікі захоўвалі маўчанне амаль год, пакуль летам 2022-га першы віцэ-прэм'ер Мікалай Снапкоў не пацвердзіў задачу Лукашэнкі: да 2025 года ў Беларусі плануюць максімальна асвоіць зборку айчынных электрамабіляў.
У гэты момант, калі да выканання пастаўленай задачы заставалася менш за тры гады, чыноўнікі пачалі гісторыю з вытворчасцю беларускага электрамабіля «з нуля». Мінулай восенню генеральны дырэктар «"БелДжы» Генадзь Свідзерскі паведаміў, што яго прадпрыемства думае над стварэннем электракара для Саюзнай дзяржавы.
«Супольна з Аб'яднаным інстытутам машынабудавання НАН Беларусі мы праводзім шэраг работ і кансультацый. Акрамя гэтага, вядзём перамовы з кітайскімі кампаніямі і з кампаніямі «АўтаВАЗ». Ідэя ў тым, каб знайсці перспектыўную платформу электрамабіля і выкарыстоўваць тыя напрацоўкі кампанентаў, якія ёсць у Інстытуце машынабудавання. Таксама будзем выкарыстоўваць сучасныя тэхналагічныя працэсы вытворчасці аўтамабіля, якія ёсць на заводзе «БелДжы». Цяпер гэтае пытанне знаходзіцца ў стадыі прапрацоўкі. Па меры таго, як гэта ўсё будзе ўзгоднена, мы больш дэталёва праінфармуем аб плане работ для стварэння саюзнага аўтамабіля», - сказаў Свідзерскі.
Следам за ім пра новую ідэю паведаміў Гусакоў, які прапанаваў разгледзець варыянт стварэння «свайго беларускага электрамабіля» ў рамках так званай саюзнай дзяржавы.
З гэтых заяў можна было зрабіць шакавальную выснову: мала таго, што абяцанні, якія даюцца цягам многіх гадоў, не былі выкананыя, дык яшчэ высветлілася, што ні Акадэмія навук, ні «БелДжы» не прасунуліся хоць на каліва ў гэтым кірунку.
У пачатку 2023 года нядобрае западозрыў прэм'ер-міністр Раман Галоўчанка. Наведваючы «Белкамунмаш», ён адзначыў: ключавое пытанне, якое сёння абмяркоўваецца, - рэальныя тэрміны стварэння ўласнага легкавога электрамабіля.
А зусім нядаўна гендырэктар «БелДжы» Свідзерскі выступіў з заявай, з якой вынікае, што задача Лукашэнкі ў стварэнні айчыннага электракара да 2025 года нявыкананая. Віну ён пераклаў на Акадэмію навук.
Калі ідзе гаворка, калі ж з’явіцца зусім айчынны аўтамабіль, то, думаю, зусім айчынны з’явіцца не раней чым праз тры гады (гэта значыць у 2026-м! заўв.). Але калі зараз мы далі ў Акадэміі навук платформу, мы сёння як гаворыцца: электрацягавы рухавік асвоілі, сістэму кіравання асвоілі. Наколькі я ведаю, у Акадэміі навук вядуцца распрацоўкі батарэі, якая, мяркуецца, будзе сабекоштам ніжэйшым, чым тыя, якія сёння выпускаюцца ў свеце. Таму гэты паслядоўны рух, на жаль, не дазваляе нам хутка рухацца», - сказаў Свідзерскі.
Такім чынам беларускія чыноўнікі ўсё бліжэй падбіраюцца да знакавага юбілею: у 2027-м споўніцца дзесяць гадоў іх размовам аб тым , што беларускі электракар вось-вось будзе створаны.