Індыец хацеў з'ехаць з Беларусі ў Польшчу з падробленым брытанскім пашпартам

• 28.11.2023, 16:00

Сапраўдны пашпарт быў у яго ў чаравіку.

Беларускія памежнікі затрымалі індыйца з падробленым брытанскім пашпартам. Ён спрабаваў выехаць з Беларусі на аўтобусе «Менск – Варшава».

Уначы 24 лістапада ў пункце пропуску «Брэст» памежнікі выявілі пасажыра аўтобуса, які паказаў пашпарт грамадзяніна Вялікай Брытаніі. Памежнікі засумняваліся ў сапраўднасці дакумента. Спецыяльная праверка вызначыла, што пашпарт – падроблены, паведамляе Дзяржаўны памежны камітэт.

У чаравіку замежніка быў знойдзены сапраўдны пашпарт на імя грамадзяніна Індыі. Мужчына растлумачыў, што прыбыў у Менск з Масквы і збіраўся патрапіць у Партугалію.

Іншаземца выправілі ў ІЧУ. Распачатая крымінальная справа за выкарыстанне падробленага дакумента.