Уладальніца сэканду з Дзяржынска здзіўляецца, чаму не ідуць продажы ў яе краме
- 21.11.2023, 21:37
Прадпрымальніца звярнулася да карыстальнікаў і папрасіла выказаць погляд збоку.
Жыхарка Дзяржынска Лера летась адчыніла ў гэтым райцэнтры краму адзення сэканд-хэнд. Дзяўчына ўсё робіць сама: адрамантавала памяшканне, ездзіць на склад па тавар, прадае яго ў раздроб, выпраўляе пакупнікам рэчы поштай, прыбірае гандлёвы пункт. Аднак, нягледзячы на ўсе намаганні, гандаль ідзе так дрэнна, што гаспадыня задумваецца пра закрыццё аб'екта. Пра свой бізнэс дзяўчына расказала на асабістай старонцы ў TikTok, піша «Люстэрка».
Летась Лера ўклала ўсе назапашаныя грошы ў маленькі бізнэс. Яна адчыніла амаль у цэнтры Дзяржынска краму Green Room для продажу адзення сэканд-хэнд для дарослых і дзяцей. Дзяўчына і чальцы яе сям'і самі адрамантавалі гандлёвае памяшканне, устанавілі ў ім абсталяванне, арганізавалі прымерачныя кабінкі.
Лера завяла старонку крамы ў Instagram, дзе размяшчала інфармацыю пра новыя паступленні, арганізоўвала розыгрышы, абвяшчала зніжкі. Каб не выпускаць пакупнікоў, якія знаходзяцца не ў Дзяржынску, дзяўчына пастанавіла прадаваць рэчы анлайн і высылаць іх поштай.
Аднак нядаўна Лера паведаміла ў TikTok, што справы ў крамы ідуць дрэнна – выручка вельмі маленькая, часам за дзень у краму ніхто не заходзіць. Паводле вынікаў працы за год дзяўчына «нават не выйшла ў нуль» у выдатках, арэнду 650 рублёў плаціць вельмі цяжка. Лера здзіўляецца, чаму так адбываецца, бо адзенне яна набывае добрае, катэгорый «сток» (новыя рэчы са старых калекцый) і «суперкрэм» (гэта гатункаваны сэканд, сярод якога шмат новых з біркамі рэчаў, трапляюцца і брэнды).
Таксама прадпрымальніца звярнулася да карыстальнікаў і папрасіла выказаць погляд з боку, чаго не стае ў яе краме і што можна зрабіць, каб продаж пайшоў.
У адказ на заклік Леры каментароў было вельмі шмат. Хтосьці выказаўся вельмі негатыўна, маўляў, «рэчы гэтыя забіраюць ад мерцвякоў», а потым перапрадаюць утрая даражэй. Некаторыя карыстальнікі мяркуюць, што тавар у краме развешаны няправільна – трэба рэчы размясціць па тыпе тканіны або колеру. Іншыя пісалі, што ўся справа ў шыльдзе перад уваходам – гледзячы на яе, незразумела, што знаходзіцца ўнутры. Трэція перакананыя, што размяшчэнне гандлёвага пункта няправільнае і на гэтым месцы добрых продажаў не будзе.
«У вас побач Wildberries, яны ўсіх пакупнікоў забіраюць. Лепш бы вы адкрылі кавярню, а не сэканд», – выказваліся людзі.
Было і зусім супрацьлеглае меркаванне: «Там жа Wildberries – гэта добра, увесь струмень людзей ваш павінен быць».
Песімістычна настроеныя людзі раілі Леры прадаць усё, што ёсць у краме, пабудаваць дом з басейнам і лазняй і здаваць яго штодзённа для вечарынак. Адгукнуліся і людзі, якія маюць досвед вядзення дробнага бізнэсу, вось што некаторыя з іх напісалі:
«Закрывайце своечасова гэты бізнэс, сама трымала, ведаю, што гэта такое. Скідвайце ўсё, што засталося, мінімальным коштам».
«Не хвалюйцеся, нашай краме ўжо другі год, мы таксама ў поўнай ж***. Кожны дзень хочацца зачыніцца».
«Я пратрымалася два гады. Вынік: ІП прыпыненае, рэчы ў гаражы мужа. Мне не пашанцавала».
«Тое самае. Мы з Астраўца. Жонка адчыніла краму касметыкі. Кожны дзень думае зачыняць, пакуль памянялі памяшканне, паглядзім, што будзе да Новага года».
«У мяне ўжо тры гады ІП. Было пару крамаў, ужо адну апошнюю цягнем за вушы. Падаткі і арэнда ўсё з'ядаюць».
«Зачыняйцеся, мы зачыніліся праз 8 месяцаў. Калі побач ёсць вялікія крамы, яны вас задушаць. Арэнда, рэшткі, усе хочуць новы тавар. Няма сэнсу».
Тым не менш зачыняць краму Лера пакуль не хоча. Кожны дзень дзяўчына здымае ролікі з водгукамі пакупнікоў аб тавары ў краме, робіць агляды адзення, якое яна прадае, а таксама запрашае людзей па набыткі.