Знаўцы «Што? Дзе? Калі?» не адказалі на пытанне беларуса пра быкоў і ПДР

• 21.11.2023, 20:29

Пытанне выкладніка з Віцебска прынесла пераможны бал тэлегледачам.

У зімовай серыі гульняў азербайджанскага клуба «Што? Дзе? Калі?» каманда Руслана Мірзаліева саступіла тэлегледачам з лікам 4:6. Пераможны бал тэлегледачам прынёс выкладнік з беларускага Віцебска Аляксей Кудраўцаў, піша КП.

Яго пытанне было такое:

«Жыхарам канадскай правінцыі Новая Шатландыя 1923 запомніўся як “Год бясплатнай ялавічыны”. Гэтая мянушка з'явілася таму, што мясцовыя фермеры, асцерагаючыся судовых цяжбаў і вялікіх штрафаў, цягам гэтага года здалі на бойню ўсіх цяглавых быкоў. Якая пастанова ўладаў правінцыі, прынятая за некалькі месяцаў да гэтага, прывяла да такіх наступстваў?»

Знаўца Джаміль Салманаў адказаў:

«Штрафы былі звязаныя з нейкай тэхнікай. Тады сталі папулярныя машыны. І калі машына раптам саб'е нейкую цяглавую жывёлу, то віна будзе на ўладальніку гэтай жывёлы. І таму, каб унікнуць гэтага, закон мог быць такі. Ці ім проста забаранілі выходзіць неяк на праезную частку».

Правільны адказ агучыў вядучы:

«Рэч у тым, што людзі могуць хутка перабудавацца і жыць паводле новых правілаў, а вось растлумачыць быкам, што цяпер трэба цягнуць вазы па правым баку дарогі, а не па левым, не атрымлівалася. Яны прадаўжалі рухацца па левым баку дарогі і сутыкаліся з аўтамабілямі. Няспынныя штрафы і судовыя цяжбы прымусілі фермераў Новай Шатландыі здаць цяглавых быкоў на мяса. У пачатку 1923 года ўлады правінцыі прынялі пастанову перайсці на правабаковы рух».