СМІ: Мікола Статкевіч знаходзіцца ў глыбоцкай калоніі ў вельмі цяжкіх умовах

• 21.11.2023, 15:33

ПКТ яму чаргуюць са штрафным ізалятарам.

Палітвязень Мікола Статкевіч знаходзіцца ў глыбоцкай калоніі ў «вельмі цяжкіх умовах». Пра гэта «Радыё Свабода» паведаміла неназваная крыніца.

Сваякі палітыка праз «другія рукі» атрымалі пацвярджэнне, што ён дагэтуль знаходзіцца ў глыбоцкай калоніі №13, дзе па чарзе сядзіць то ў адзіночнай камеры ПКТ, то ў штрафным ізалятары.

«Яго пазбавілі права на званкі, пазбавілі адной на год перадачы і сустрэчы. Сядзіць у адзіночнай камеры ПКТ, якую рэгулярна чаргуюць са штрафным ізалятарам», - паведаміла журналістам крыніца.

«280 дзён цішыні прайшло. Колькі яшчэ? - Такі запіс пакінула ў Facebook жонка палітыка Марына Адамовіч, якая лічыць дні вымушанага маўчання свайго мужа. Апошні ліст ад мужа яна атрымала 9 лютага.

На 21 лістапада Мікола Статкевіч ужо 285 дзён не тэлефанаваў сваякам, ад яго не прыходзяць лісты, адпраўленыя палітвязню медбандэролі вяртаюць назад. Акрамя таго, да палітыка не можа патрапіць адвакат.

31 траўня 2020 года Мікола Статкевіч быў затрыманы па дарозе на пікет, а ў снежні 2021 года прысуджаны да 14 гадоў калоніі асаблівага рэжыму.

Нагадаем, што за бяспрыкладную мужнасць у супраціве рэжыму Статкевіч правёў у зняволенні больш за 10 гадоў. Палітык тройчы быў прызнаны Amnesty International вязнем сумлення. Нават знаходзячыся ў зняволенні, Мікола Статкевіч застаецца для беларусаў сімвалам стойкасці духу.