«Лукашэнка быў шакаваны»

• 14.11.2023, 18:17

Аналітыкі расказалі аб траўме, атрыманай беларускім дыктатарам.

Сайт «Зеркало» задаўся пытаннем, чаму Лукашэнка дагэтуль баіцца пратэстаў? Палітолаг Аляксандр Класкоўскі мяркуе, што беларускі дыктатар разумее, што ягонае «залатое стагоддзе» прайшло:

- Галоўная прычына ў тым, што ў 2020 годзе Аляксандр Лукашэнка быў шакаваны маштабам пратэстаў. Зверху была спушчаная ўстаноўка падтрымліваць высокі ўзровень страху ў грамадстве. Думаю, Лукашэнка ў глыбіні душы разумее, што, хаця пратэсты ўжо закатаныя ў асфальт, залаты век для яго прайшоў і новага ўсплёску народнай любові не будзе.

Палітолаг Валерый Карбалевіч выказаў меркаванне, што Лукашэнка атрымаў траўму:

- З аб'ектыўных прычын улады баяцца паўтарэння падзей 2020 года. Траўма, якую тады атрымала ўлада, ніяк не загойваецца. Таму, каб кампенсаваць гэта, арганізуюцца ўсё новыя і новыя аблавы на людзей, затрыманні, арышты, суды і пакаранні, - адзначае аналітык.