У Гародні п'яная дзяўчына напала на аўтамабіль таксі

• 15.09.2022, 10:59

Яна падумала, што яе аўто занялі іншыя пасажыры.

Днямі ў Гародні адбыўся дзіўны інцыдэнт, якога магло не быць увогуле. Спадарыні здалося, што кіроўца таксі ўзяў іншых пасажыраў і за гэта яна стала нішчыць яго аўто.

Усё адбылося раніцай каля бара па вуліцы Горкага. Кіроўцу таксі давялося выклікаць міліцыю, каб уціхамірыць раз'юшаную патэнцыйную пасажырку.

Высветлілася, спадарыня выклікала таксі, а калі аўто прыехала і яе кіроўца яшчэ не паспеў высадзіць іншых пасажыраў, маладая асоба чамусьці падумала, што яе апярэдзілі - занялі аўто.

- Гарадзенка раз’юшылася: на падвышаных тонах з выкарыстаннем лаянкі стала абурацца, паводзіць сябе абуральна, накіравалася да аўто і некалькі разоў ударыла па ім. Нанесеная шкода ўладальніку склала больш за 400 беларускіх рублёў, - расказалі ў Гарадзенскай абласной управе Дэпартамента аховы.

На 25-гадовую затрыманую распачалі крымінальную справу за хуліганства.