Белы дом выклікаў пасла Кітая пасля эскалацыі вакол Тайваня

• 5.08.2022, 14:09

Вашынгтон абвінаваціў КНР у правакацыях.

Белы дом выклікаў у чацвер, 4 жніўня, пасла Кітая, каб асудзіць эскалацыю дзеянняў Пекіна супраць Тайваня і пацвердзіць, што ЗША не хочуць крызісу ў рэгіёне, пасля візіту спікеркі палаты прадстаўнікоў Нэнсі Пэласі на востраў.

Пра гэта паведамляе The Washington Post.

«Пасля начных дзеянняў Кітая мы выклікалі амбасадара (Кітайскай Народнай Рэспублікі, - рэд.) Цінь Гана ў Белы дом, каб выкрыць правакацыйныя дзеянні КНР», - заявіў афіцыйны прадстаўнік Белага дома Джон Кірбі ў заяве, прадстаўленай выданню.

З ягоных слоў, у ЗША «асудзілі ваенныя дзеянні КНР, якія безадказныя і супярэчаць даўняй мэце - падтрыманню міру і стабільнасці ў Тайваньскай пратоцы».

Як паведамлялася, Кітай уводзіць санкцыі ў дачыненні да спікеркі Палаты прадстаўнікоў ЗША Нэнсі Пэласі.

Да гэтага Кітай абмежаваў свой гандаль з Тайванем на фоне павышанай напружанасці праз візіт спікеркі Палаты прадстаўнікоў Нэнсі Пэласі на востраў.