Вызваленая Чарнабаеўка ўсеяная разбітай расейскай ваеннай тэхнікай

• 13.11.2022, 16:48

Украінскія байцы знішчылі ў поўным складзе штаб 20-й мотастралковай дывізіі.

У вызваленай ад акупантаў Чарнабаеўцы куча разбітай украінскімі абаронцамі ваеннай тэхнікі расейцаў.

Відэа апублікаваў галоўны рэдактар Цензор.НЕТ Юры Бутусаў у Telegram.

«Чарнабаеўка ўсеяная разбітай расейскай вайсковай тэхнікай. Аэрадром Чарнабаеўка стаў базай расейскіх акупантаў пад Херсонам і адчуваў шматразовыя ракетныя ўдары УС Украіны», – гаворыцца ў паведамленні.

Юрый Бутусаў адзначае, што менавіта тут ударам ракетаў HIMARS быў знішчаны ў поўным складзе штаб 20-й мотастралковай дывізіі, забіты камдзіў.

«Гэтае месца стала і адным з вядомых месцаў вайны – як сімвал упартасці расейскага камандавання, якое ўвесь час канцэнтравала войскі на гэтай базе, што прыводзіла да цяжкіх стратаў расейцаў, і сімвал майстэрства ўкраінцаў, якія знаходзяць спосабы граміць і перамагаць расейскіх акупантаў», – напісаў журналіст.