У Беларусі могуць значна падаражэць паслугі таксовак
- 22.07.2021, 11:54
Падрыхтаваны праект спецыяльнага ўказа.
У Беларусі плануюць увесці абавязковую рэгістрацыю таксістаў. Падрыхтаваны праект указа, паводле якога транспартная інспекцыя фактычна будзе дапускаць на рынак як кіроўцаў-таксістаў, так і дыспетчараў.
Спецыяльныя карты допуску павінны будуць атрымліваць кіроўцы, дыспетчары аўтамабільных перавозак пасажыраў у нерэгулярных злучэннях, дыспетчары таксовак. Таксама трэба будзе мець рэгістрацыйную карту на транспартны сродак. Без гэтага на легальны рынак таксовак і нерэгулярных перавозак дзяржава нікога не дапусціць. Рэгістрацыя будзе праводзіцца праз электронны сэрвіс, дзе ў кіроўцаў і дыспетчараў будуць асабістыя старонкі, паведамляе officelife.media.
Таксісты павінны будуць заплаціць палову базавай за допуск на рынак
Калі будзе прыняты ўказ аб рэгістрацыі таксістаў і дыспетчараў праз транспартную інспекцыю, то ўлады пачнуць збіраць падаткі за допуск да легальнага рынку. За кожнае аўта «нерэгулярнікам» і службам таксі трэба будзе заплаціць дзве базавыя (цяпер гэта 58 рублёў), за ўнясенне змяненняў у рэгкарту - адну базавую (29 рублёў). На аднаго кіроўцу - палова базавай (14,5 рубля).
Дыспетчарскія службы, у тым ліку розныя інтэрнэт-сэрвісы, будуць абавязаныя заплаціць па 100 базавых (2,9 тысячы рублёў). За ўнясенне змяненняў у карту рэгістрацыі - адну базавую (29 рублёў). Больш за тое, дыспетчар пасажырскіх перавозак (ад «нерэгулярніка» да інтэрнэт-сэрвісу тыпу «Яндэкс») павінен будзе да 20-га чысла месяца, наступнага за справаздачным кварталам, падаваць падаткавікам звесткі аб выкананых перавозках.
Без допуску да рынку і наступнай справаздачнасці праца такіх сэрвісаў, як «Яндэкс» і Uber, будзе абвешчаная ў Беларусі незаконнай. Больш дэталёва правілы допуску прапіша Саўмін.
Транспартная інспекцыя можа прыпыніць допуск таксіста на месяц, а дыспетчара - на тры месяцы. Гэта магчыма, калі:
былі два і больш адміністрацыйныя спагнанні за год за парушэнне ўстаноўленага парадку прыёму сродкаў аплаты і (або) выкарыстання касавага абсталявання і (або) аплатных тэрміналаў;
адбылося тое ж самае ў выпадку выкарыстання незарэгістраваных інфармацыйных платформаў;
пададзеная несапраўдная справаздача ў падатковую інспекцыю;
заказ перададзены незарэгістраванаму кіроўцу;
транспартныя сродкі не адпавядаюць патрабаванням закона.
Інспекцыя таксама мае права наогул спыніць дзеянне рэгістрацыйнай карты. Напрыклад, калі кіроўца-таксіст, у якога допуск прыпынены, не папрасіў цягам месяца зняць абмежаванне. Таксама ўказ адназначна патрабуе ўкласці працоўныя дамовы з таксістамі. Арандатарамі машын на час змогуць быць толькі ІП і юрыдычныя асобы.
Калі ўказ будзе падпісаны і афіцыйна апублікаваны, то ён набудзе моц праз паўгода.
Максім Казлоў, дырэктар у сувязях з дзяржаўнымі органамі на міжнародных рынках Яндэкс Go:
- Указ у такім выглядзе прычыніць шкоду пасажырам, усёй сферы таксовак і самой дзяржаве. Пры прыняцці жорсткіх заканадаўчых захадаў заўсёды важна ацэньваць уздзеянне на галіну і наступствы. Наколькі мы бачым, з праектам указа гэтага зроблена не было.
Перш за ўсё, ён ударыць па найменш абароненых пластах насельніцтва - тых людзях, для якіх праца ў таксі - гэта дадатковая крыніца заробку. На нашы падлікі, практычна палова кіроўцаў - гэта дзясяткі тысяч чалавек у краіне - сыдзе з галіны, бо новы дакумент забараняе падпрацоўку ў таксі ў зручны для людзей час: пасля асноўнай працы, сезонна і г.д. Пры гэтым, відавочна, рэгулятар не задумваўся пра тое, дзе людзі знойдуць замену даходу ў таксі, як яны будуць забяспечваць сябе і сям'і ў цяперашняй эканамічнай сітуацыі.
Акрамя таго, зразумела, што пры звужэнні прапановы праз адток кіроўцаў падвысяцца кошты. Абмежаваная колькасць новых, «ліцэнзаваных» вознікаў і кіроўцаў не зможа задаволіць існы цяпер высокаканкурэнтны попыт на таксоўкі. У выніку вырастуць як кошты паездак, так і час чакання аўто. Прыклады іншых рынкаў, дзе такія ініцыятывы былі рэалізаваны (Турцыя, Ізраіль, Сербія), кажуць таксама пра тое, што моцна пацерпіць якасць самой паслугі - кіроўцы будуць напраўду не спаборнічаць за пасажыра, а навязваць свае ўмовы і кошты.
Наступным крокам стане вяртанне шэрага рынку, калі людзям будзе прасцей і танней злавіць «прыватніка» на вуліцы, чым рабіць заказ праз ліцэнзаваную дыспетчарскую. Такі рынак таксовак Беларусь ужо бачыла шмат гадоў таму. Ці хоча пасажыр вярнуцца да гэтага - вялікае пытанне.
У канчатковым выніку прайграе і сама дзяржава: у пагоні за ўзмацненнем жорсткасці рэгулявання значна ўпадуць падатковыя адлічэнні (рынак моцна сціснецца ў памерах), а новыя прыватныя гульцы ў шэрай зоне, зразумелая справа, выплатай падаткаў займацца не будуць. Упадзе і занятасць насельніцтва, бо для падпрацоўкі ў таксі атрымліваць ліцэнзію на сябе і яшчэ і на машыну сэнсу не мае.