Адбылося паўторнае лёсаванне Лігі чэмпіёнаў

• 13.12.2021, 19:48

У выніках паўторнага і першага лёсавання супала толькі адна пара.

Сёння, 13 снежня, у Ньёне (Швэйцарыя) прайшло паўторнае лёсаванне 1/8 фіналу Лігі чэмпіёнаў сезону – 2021/22. Вынікі першага лёсавання былі ануляваныя праз тэхнічныя праблемы і памылкі.

Можна канстатаваць факт, што ў выніках першага і паўторнага лёсавання плэй-оф Лігі чэмпіёнаў супала толькі адна пара: "Чэлсі" – "Ліль".

Выніковыя пары 1/8 фіналу Лігі чэмпіёнаў УЕФА выглядаюць наступным чынам:

"РБ Зальцбург" (Аўстрыя) – "Баварыя" (Нямеччына);

"Спортынг" (Партугалія) – "Манчэстэр Сіці" (Англія);

"Бенфіка" (Партугалія) – "Аякс" (Нідэрланды);

"Чэлсі" (Англія) – "Ліль" (Францыя);

"Атлетыка" (Гішпанія) – "Манчэстэр Юнайтэд" (Англія);

"Вільярэал" (Гішпанія) – "Ювентус" (Італія);

"Інтэр" (Італія) – "Ліверпуль" (Англія);

"Пары Сэн-Жэрмэн" (Францыя) – "Рэал" (Гішпанія).

Вынікі першага лёсавання, якое было ануляванае, выглядалі так:

"Бенфіка" (Партугалія) – "Рэал" (Гішпанія);

"Вільярэал" (Гішпанія) – "Манчэстэр Сіці" (Англія);

"Атлетыка" (Гішпанія) – "Баварыя" (Нямеччына);

"Зальцбург" (Аўстрыя) – "Ліверпуль" (Англія);

"Інтэр" (Італія) – "Аякс" (Нідэрланды);

"Спортынг" (Партугалія) – "Ювентус" (Італія);

"Пары Сэн-Жэрмэн" (Францыя) – "Манчэстэр Юнайтэд" (Англія);

"Чэлсі" (Англія) – "Ліль" (Францыя).

Нагадаем, вынікі першага лёсавання былі ануляваныя, бо ў спаборнікі «Вільярэалу» былы расейскі футбаліст Андрэй Аршавін выцягнуў шар з ангельскім «Манчэстэр Юнайтэд», камандай, якая сустракалася з гішпанскім клубам на стадыі групавога этапу турніру. Таму яны не маглі згуляць адзін супраць аднаго ў 1/8 фіналу, і лёсаванне было праведзенае яшчэ раз.

Пасля гэтага спаборнікам «Вільярэала» стаў «Манчэстэр Сіці», а «Манчэстэр Юнайтэд» дастаўся «ПСЖ». Галоўнай праблемай было тое, што шар з «Манчэстэр Юнайтэд» не быў змешчаны ў кошык з магчымымі спаборнікамі «Атлетыка». Гішпанцы падалі пратэст, і УЕФА яго ўхваліў.

Першыя матчы 1/8 фіналу адбудуцца 15, 16, 22 і 23 лютага, іншыя матчы можна будзе ўбачыць 8, 9, 15 і 16 сакавіка. Фінал Лігі чэмпіёнаў сезону – 2021/22 адбудзецца 29 траўня 2022 года ў Санкт-Пецярбургу.