Вільня-2019 – гэта нацыянальны эпас

• 24.11.2019, 9:45

Чалавек, які праз гады скажа, што быў на развітанні з Каліноўскім, будзе амаль героем.

Пра гэта ў «Фэйсбуку» напісаў беларускі гісторык і літаратар Усевалад Сцебурака:

«Вільня 22 лістапада 2019-га – гэта як Хадж. Даехалі нямногія. Але тым большы рэспект тым, хто змог. Гэта тое, успаміны і аповеды пра што будуць усё больш каштоўнымі з кожным скончаным годам.

Гэта тое, што можна апавядаць у сяброўскай гутарцы і дзецям на ўроках. Гэта нацыянальны эпас. Чалавек, які ў 2063-м скажа “я быў у Вільні 2019-га” – будзе амаль героем.

Ім трэба будзе прайсці асобнай калонай, як ветэранам.

Не думаю, што мне давядзецца. Але тая хвіліна, калі мы спыніліся пад Вострай брамай, застанецца са мной да канца».