Улады Нідэрландаў маюць намер спыніць выкарыстанне назвы Галандыя

• 5.10.2019, 17:37

Таксама плануецца адмовіцца ад выкарыстання цюльпана ў якасці сімвала дзяржавы.

Урад Нідэрландаў мае намер спыніць выкарыстанне назвы Галандыя, цяпер замест яе будзе выкарыстоўвацца толькі афіцыйная назва краіны. Пра гэта паведамляе выданне Adformatie, піша «Гордон».

Пастанова была прынятая для абнаўлення глабальнага іміджу краіны. Новую стратэгію нацыянальнага рэбрэндынгу падпісалі лідары бізнэсу, рада ў турызме і ўрад краіны.

Рэалізацыя стратэгіі пачнецца ў канцы года.

Паводле звестак выдання, улады краіны хочуць зрушыць міжнародны акцэнт з пэўных аспектаў нацыянальнага жыцця, з якімі гэтая краіна звычайна асацыюецца - з наркотыкаў і раёна чырвоных ліхтароў Амстэрдама. Улады таксама плануюць адмовіцца ад выкарыстання цюльпана ў якасці сімвала дзяржавы.

Рэбрэндынг стане менш рэкламным і больш змястоўным. Аранжавы застаецца фірмовым колерам дзяржавы.

Нідэрланды часта называюць Галандыяй, аднак Паўднёвая і Паўночная Галандыя - толькі дзве з 12 правінцый цяперашніх Нідэрландаў. Яны традыцыйна з'яўляюцца самымі развітымі, таму найбольш вядомымі за межамі краіны. Менавіта таму гэта назва ўвайшла ва ўжытак як яшчэ адна назва Нідэрландаў.