Менчукам раяць не выходзіць на двор

• 10.01.2017, 19:02

У сталіцы змог: канцэнтрацыя шкодных дробных часціц у паветры перавысіла норму ў 2,5 разы.

Маразы спалі, тэмпература за акном ужо як стандартная зімовая, але знаходзіцца на дварэ ў Менску складана.

- Ужо два дні няма чым дыхаць, - скардзіцца kp.by мянчанка Наталля з Уручча. - Здавалася б, раніцай паветра павінен быць самым чыстым, але не, на вуліцы адчуваю сябе ў газавай камеры. Увечары хочацца адкрыць акно дома, каб упусціць свежае паветра, але яго проста няма.

- Усе скаргі абсалютна справядлівыя. Насуперак усім нашым прагнозам аб тым, што паветра будзе чыстым, найбліжэйшыя пару дзён дыхаць на поўныя грудзі менчукам наўрад ці ўдасца. Я і сама на двор стараюся не выходзіць, - шчыра кажа начальніца інфармацыйна-аналітычнага аддзела маніторынгу атмасфернага паветра Рэспубліканскага цэнтра гідраметэаралогіі, кантролю радыеактыўнага забруджвання і маніторынгу навакольнага асяроддзя Мінпрыроды Беларусі Багдана Казярук. - Сітуацыя з паветрам у Менску цяпер неспрыяльная.

- У чым жа прычына? Смог прыйшоў з суседняй Польшчы, дзе людзі цяпер таксама даслоўна дыхаюць праз раз?

- Скажу так, горад у цяперашнім смогу мы дакладна не вінавацім. Усе кацельні ў Менску працуюць на газе. Адной з прычын пагаршэння якасці паветра могуць быць транспартныя коркі, але галоўнай прычынай цяперашняга смогу яны дакладна не з'яўляюцца. Смог, які ўжо пару дзён вісіць над Менскам, прынёс паўночны вецер. Але толькі на Каляды ён даў нам практычна ідэальна чыстае паветра, а потым прыцягнуў дым з наваколля. У правінцыі слупок тэрмометра апусціўся яшчэ ніжэй, чым у сталіцы, і людзі ацяпляюць дамы чым толькі магчыма. Паводле нашай версіі, завісь смалі і дыму ў Менск прыйшла менавіта з правінцыі. Значыць, прычына смогу такая ж, як і ў Польшчы. Людзі актыўна ацяпляюць дамы.

- Так, але Менск заўсёды называлі горадам з добрым праветрываннем... Чаму гэтым разам смаль над намі завісла? І наколькі бруднае паветра цяпер у сталіцы?

- Так, Менск сапраўды добра прадзімаецца, і сітуацыі, калі мы пачынаем турбавацца за якасць паветра, здараюцца даволі рэдка, - кажа Багдана Казярук. - Але цяпер практычна надвор'е ціхае. Дыму няма куды дзецца.

Максімальная канцэнтрацыя шкодных часціц у паветры ўжо перавысіла гранічна дапушчальную канцэнтрацыю (ГДК). Сітуацыя змяняецца кожныя паўгадзіны, забруджванні фіксуюцца хвалепадобна. Літаральна ў абед канцэнтрацыя шкодных дробных часціц у паветры перавысіла ГДК у 2,5 разы, хоць для нас нават паказчык 1,1 ўжо нязвыклы. Тым больш пры такім ідэальным для паветра, надвор'і, як цяпер.

- Дзе цяпер самае бруднае паветра ў сталіцы?

- Перавышэнне ПДК у 2,5 разы зафіксавала наша станцыя ва Уруччы. Але ўжо паступаюць скаргі і з Фрунзенскага, і з іншых раёнаў сталіцы.

- Калі сітуацыя зменіцца?

- Выратаваннем можа стаць толькі вецер. Шквалісты вецер - разам з завеямі нам абяцаюць у чацвер. Усё знікне, як і не бывала. Трэба ператрываць. А пакуль трэба сачыць за самаадчуваннем і берагчы сябе. Асабіста я на двор не пайду. Нягледзячы на тое, што сёння завісь над горадам візуальна меншая, узровень забруджвання вырас.

У тым, што гэта сапраўды так, можна пераканацца, зайшоўшы на сайт rad.org.by. Сітуацыя аб забруджанасці паветра там абнаўляецца ў рэжыме рэальнага часу. Так, напрыклад, паводле звестак сталічнай станцыі на вуліцы Герояў 120-й дывізіі, 15, канцэнтрацыя ў паветры NO на 13.20 складала 2.87 ГДК, а NO2 - 1.76 ГДК. NO і NO2 - гэта аксіды азоту. NO уважаецца за моцны яд, які ўплывае на цэнтральную нервовую сістэму, можа прывесці да пашкоджання крыві за кошт звязвання гемаглабіну. NO2 таксама праяўляе высокую таксічнасць, можа справакаваць раздражненне дыхальных органаў.

- Гэта не самы страшны паказчык, былі сітуацыі, калі мы фіксавалі і па 3, і па 5 ГДК, - супакойваюць эколагі. Панікаваць не трэба, але выконваць захады бяспекі нікому не перашкодзіць.

Кампетэнтна

Астматыкам на вуліцу лепш не выходзіць!

- Смог раздражняе дыхальныя шляхі. Асабліва ён небяспечны для астматыкаў. Шкодныя рэчывы, якія трапляюць у бронхі, могуць выклікаць абвастрэнне бранхіяльнай астмы. Можа пагоршыцца самаадчуванне і ў людзей з хранічным бранхітам, ларынгітам або фарынгітам, - растлумачылі ў Гарадской клінічнай лякарні хуткай медыцынскай дапамогі. - Таму на двор у смог лепш не выходзіць. А калі вельмі трэба, апранайце медыцынскую маску альбо закрывайце нос і рот шалікам і дыхайце праз яго. Пазбягайце нізінных раёнаў горада, там канцэнтрацыя шкодных рэчываў у паветры самая вялікая. Напрыклад, ля Нямігі.

Топ-5 парад ад медыкаў, як паводзіць сябе ў варунках смогу

1. Піце шмат вадкасці, старайцеся не адчыняць форткі.

2. Часцей мыйце кватэру! Вільготнае прыбіранне робіць паветра чысцейшым.

3. Спажывайце больш яркай гародніны і садавіны, гэта выдатныя антыаксіданты, а іх абалоніна дапаможа ачысціць арганізм ад шкодных рэчываў, якія паступаюць з выкідамі.

4. Адмоўцеся ад алкаголю, піва і курэння, яны могуць справакаваць развіццё вострых і хранічных захворванняў сэрцава-судзінай і дыхальнай сістэм.

5. Каб знізіць таксічнае ўздзеянне смогу, прымайце полівітаміны (калі няма супрацьпаказанняў), часцей прамывайце нос і горла. На выпадак, калі сітуацыя з паветрам пагоршыцца, можна піць адхарквальныя сродкі на аснове мукалтыну, лібселен (абараняе ад атручванняў свінцом, кадміем, ртуццю, тытунёвым дымам і выхлапнымі газамі). Калі самаадчуванне значна пагоршыцца - не адкладаючы выклікаць лекара.