Зяць Трампа адмовіўся атрымліваць заробак на пасадзе дарадцы прэзідэнта

• 10.01.2017, 10:13

Інфармацыю пацвердзілі ў пераходным штабе Дональда Трампа.

Абраны прэзідэнт ЗША Дональд Трамп вырашыў прызначыць мужа сваёй дачкі Джарэда Кушнера на пасаду старэйшага дарадцы кіраўніка дзяржавы. Гэтую інфармацыю, перададзеную раней тэлеканалам CNBC, пацвердзіў пераходны штаб кіраўніка дзяржавы, паведамляе tut.by.

Да гэтага амерыканскія СМІ меркавалі таксама, што 35-гадовы Кушнер, які з'яўляецца ўладальнікам штотыднёвіка The New York Observer, можа быць прызначаны на пасаду кіраўніка апарата супрацоўнікаў Белага дома. Аднак Трамп абвясціў, што гэтую пасаду зойме старшыня Нацыянальнага камітэта Рэспубліканскай партыі Райнс Прыбэс.

Як удакладніў пераходны штаб рэспубліканца, Кушнеру трэба будзе «цесна ўзаемадзейнічаць з Райнсом Прыбэсам і Стывенам Бэнанам», які прызначаны ключавым палітычным дарадцам 45-га прэзідэнта ЗША. «Кушнер вырашыў адмовіцца ад заробку на час працы ў адміністрацыі», — падкрэслілі ў штабе.

«Джарэд цягам усёй перадвыбарнай кампаніі і перадачы спраў паказаў сябе каштоўным актывам і даверанай дарадцам, таму я ганаруся тым, што ён будзе выконваць лідзіруючую ролю ў маёй адміністрацыі», — адзначыў у гэтай сувязі Трамп. Ён таксама выказаў упэўненасць, што яго зяць «будзе настолькі ж паспяховым у палітыцы, як раней у бізнэсе».

Падчас выбарчай кампаніі Трампа Кушнер кіраваў інтэрнэт-стратэгіямі і займаўся пытаннямі найму высокапастаўленых супрацоўнікаў.

У рэдакцыйным артыкуле, апублікаваным у газеце, якая належыць яму, New York Observer, Джарэд Кушнер, па веравызнанні іудзей, абараняў Трампа ад абвінавачванняў у антысемітызме. У гэтым жа артыкуле Кушнер распавёў, што яго бабуля родам з Навагрудка і ў гады Вялікай Айчыннай вайны далучылася да партызанскай брыгады Бельскіх. «Там яна сустрэла майго дзядулю, які таксама ўцёк з канцлагера», — распавёў зяць Трампа.