Мечыслаў Грыб: «Усебеларускі сход» Канстытуцыяй не прадугледжаны
- 21.06.2016, 20:23
На якой падставе ўлады выдаткоўваюць нашы грошы на свае прапагандысцкія сходы?
Так званы Усебеларускі сход Канстытуцыяй Рэспублікі Беларусь не прадугледжаны і такім чынам не можа з'яўляцца органам дзяржаўнага кіравання, мяркуе экс-старшыня Вярхоўнага Савета Беларусі Мечыслаў Грыб.
Пра гэта ён напісаў на сваёй старонцы ў Facebook:
"Заўтра (22 чэрвеня) пачынае сваю працу ўсебеларускі сход. Улады называюць яго "народным веча", а апазіцыя "народным веча без народа". Апазіцыя спасылаецца на тое, што парадак выбару дэлегатаў сходу, вызначаны ўладай, не з'яўляецца дэмакратычным і ўсенародным. Апазіцыйныя палітычныя партыі, нават афіцыйна зарэгістраваныя ў Мінюсце, пазбаўленыя права вылучаць сваіх дэлегатаў на гэты сход і нават браць удзел у сходах для іх вылучэння.
Практычна ўсе вызначае выканаўчая ўлада паводле канкрэтных загадаў з верху. СМІ паведамляюць, што сярод абраных дэлегатаў шмат асоб, якія былі ўжо дэлегатамі на папярэдніх ўсебеларускіх сходах. А гэта людзі ўжо правераныя на адданасць улады і будуць галасаваць так, як скажа ўлада.
А наогул такі сход Канстытуцыяй Рэспублікі Беларусь не прадугледжаны і не можа з'яўляцца органам дзяржаўнага кіравання з усімі магчымымі адсюль наступствамі. А, акрамя таго, немагчыма ўявіць як, якім чынам сход дзвюх з паловай тысяч людзей зможа дэталёва разгледзець, абмеркаваць і прыняць праграму сацыяльна-эканамічнага развіцця краіны на пяцігодку.
Незразумела і тое, што гэтая самая праграма не абмяркоўвалася і не прымалася спачатку ў парламенце, перад вынясеннем яе на абмеркаванне "ўсебеларускага сходу". Мабыць, дэпутаты "парламента" ўжо не з'яўляюцца афіцыйнымі прадстаўнікамі народа? Я, вядома, не супраць сходу, але ўсё трэба рабіць у адпаведнасці з галоўным законам краіны - Канстытуцыяй", - перакананы Мечыслаў Грыб.
У сувязі з гэтым напрошваецца слушнае пытанне, на якой падставе ўлады выдаткоўваюць нашы грошы, прычым грошы велізарныя, на свае прапагандысцкія шабашы, ды яшчэ і падчас крызісу?