Апазіцыйныя структуры дамовіліся аб каардынацыі падчас «парламенцкіх выбараў»
- 21.06.2016, 18:08
Шэраг дэмакратычных арганізацый Беларусі 21 чэрвеня закончылі працэс падпісання пагаднення аб каардынацыі сваёй дзейнасці падчас выбарчай кампаніі.
Пагадненне было падпісана ў рамках сталай дзейнай кансультатыўнай рады прадстаўнікамі Беларускай сацыял-дэмакратычнай партыі (Грамада), Беларускай партыі левых «Справядлівы свет», руху «За Свабоду», руху «За дзяржаўнасць і незалежнасць», руху салідарнасці «Разам», незалежнага прафзвязу РЭП , аргкамітэтаў для стварэння партыі «Беларуская хрысціянская дэмакратыя», Беларускай сацыял-дэмакратычнай партыі (Народная Грамада), партыі працоўных, партыі жанчын «Надзея», партыі свабоды і прагрэсу.
Дакумент прадугледжвае прыняцце супольнай заявы з прапановамі Цэнтрвыбаркаму аб падвышэнні празрыстасці выбарчага працэсу, фармавання камісій і падліку галасоў.
Бакі дамовіліся распрацаваць супольную частку паслання выбарцам, узгадніць вылучэнне прадстаўнікоў ва ўчастковыя выбарчыя камісіі.
Пагадненне рэкамендуе прадстаўнікам апазіцыйных дэмакратычных арганізацый праводзіць супольныя пікеты для збору подпісаў за вылучэнне кандыдатаў у дэпутаты, супольныя сустрэчы з выбарцамі, а таксама ўзгадняць назіранне за падлікам галасоў.
Акрамя таго, пагадненне прадугледжвае падрыхтоўку супольных акцый пратэсту супраць фальсіфікацыі выбараў падчас і пасля выбарчай кампаніі. Пры гэтым бакі ўзгадняюць мэты, фарматы і планы акцый пратэсту, публічна абвяшчаюць пра ўзгодненыя планы акцый не пазней чым за тыдзень да іх правядзення.
«Гэта максімальна, на што здольны пайсці сёння апазіцыйны рух у супольных дзеяннях падчас выбарчай кампаніі», - заявіў БелаПАН лідар аргкамітэта для стварэння Партыі працоўных Аляксандр Бухвостаў.
Былы палітвязень Мікола Статкевіч, таксама які падпісаў пагадненне, назваў гэты дакумент «досыць сціплай» формай каардынацыі. «Гэта і зразумела, бо кансультатыўная рада - гэта пляцоўка больш для дыялогу. Але тым не менш, ёсць і канкрэтныя важныя пастановы, што тычыцца рэакцыі на магчымыя фальсіфікацыі», - адзначыў палітык.
Партыя БНФ падпісваць пагадненне адмовілася, прыняўшы адпаведную пастанову на пасяджэнні Сойма 18 чэрвеня. «Падпісваць нейкія супольныя праграмы, платформы мы не збіраемся, нам гэта абсалютна нецікава. Гэта слаба у параўнанні з нашай перадвыбарнай платформай», - заявіў лідар партыі Аляксей Янукевіч.
Парламенцкія «выбары» ў Беларусі пройдуць 11 верасня.
Нагадаем, што грамадзянская кампанія «Еўрапейская Беларусь» 20 чэрвеня зрабіла заяву, у якой заклікала беларускую апазіцыю да аб'яднання, але без камуністаў.