У Менску п'яны кіроўца ў двары дома збіў насмерць пенсіянера
- 14.06.2015, 10:20
Лекары да апошняга змагаліся за жыццё мужчыны, якога ўчора а 20.30 збіў п'яны кіроўца BMW у двары дома нумар 41 па вуліцы Нікіфарава ў менскім мікрараёне Уручча.
Але выратаваць пацярпелага не ўдалося. Пенсіянер памёр у лякарні, паведаміла карэспандэнту Onliner.by кіраўніца прэс-службы ДАІ Менска Таццяна Харлінскага. Гэта значыць, што кіроўцу пагражае крымінальная адказнасць.
Нагадаем, таксама паводле крымінальнага артыкула можа быць прыцягнуты да адказнасці ўладальнік гэтай машыны, які перадаў транспартны сродак асобе, якая знаходзiлася ў стане алкагольнага ап'янення.
Сталі вядомыя і вынікі медагляду кіроўцы BMW. У ягонай крыві было выяўлена 3,1 праміле алкаголю.
Таццяна Харлінскага падкрэсліла, што хоць агульная колькасць ДТЗ з нецвярозымі кіроўцамі ў горадзе зніжаецца (з пачатку гэтага года адбылося 10 такіх фактаў, што ў паўтара раза менш, чым за такі ж перыяд 2014), праблема як і раней застаецца актуальнай. Кожны п'яны кіроўца патэнцыйна нясе велізарную пагрозу ўсім выпадковым удзельнікам дарожнага руху, якія могуць апынуцца ў яго на шляху. У чалавека зніжаецца ўвага, запавольваецца час рэакцыі.
«Вельмі важна, каб кожны чалавек разумеў, што гэта не жарты. І любы такі ўчынак можа прывесці да непапраўных наступстваў, як гэта адбылося ва Уруччы. Ні ў якім разе нельга самому садзіцца за стырно нават пасля мінімальнай колькасці выпітага спіртнога. Строга забараняецца і перадаваць аўтамабіль такім людзям, уладальнік аўто таксама будзе несці за гэта адказнасць», - падкрэсліла Таццяна Харлінскага.
Як паведамлялася, за рулём аўтамабіля BMW 3-Series (E36 Compact) знаходзіўся мужчына 1972 года нараджэння. Побач з ім на пасажырскім сядзенні быў гаспадар машыны - мужчына 1976 года нараджэння. Абодва былі ў стане алкагольнага ап'янення. Аўтамабіль рухаўся па дваровай тэрыторыі і каля аднаго з пад'ездаў кіроўца збіў паджылога мужчыну 1941 года нараджэння. Пешахода каля 20 метраў працягнула на капоце аўтамабіля, пакуль BMW не ўрэзалася ў прыпаркаваную Peugeot. Тая ад удару прасунулася наперад і сутыкнулася з яшчэ адным аўто.