Вайсковая пракуратура праверыць дзейнасць 8 міністраў абароны Украіны

• 7.10.2014, 16:22

Вайсковая пракуратура распачала працэс аб дзейнасці 8 былых міністраў абароны Украіны на прадмет развалу Узброеных Сіл краіны.

Пра гэта заявіў галоўны вайсковы пракурор - намеснік генеральнага пракурора Украіны Анатоль Маціас, піша УНІАН.

Ён адзначыў, што за дзясятак гадоў, а асабліва за апошнія чатыры гады, было ўнесена больш за 600 змяненняў у заканадаўчыя акты, якія фактычна разбурылі цэласную сістэму і функцыянаванне Узброеных Сіл або падарвалі абараназдольнасць нашай краіны.

Прынамсі, ён растлумачыў, што «вайсковай пракуратурай была распачатая крымінальная справа паводле факта неадпаведнага выканання службовымі асобамі кіруючага складу Міністэрства абароны Украіны і Генеральнага штаба Узброеных Сіл Украіны сваіх службовых абавязкаў, якія падпісвалі гэтыя дакументы, абгрунтаванні, прадстаўленні ў органы заканадаўчай улады, у Кабінет міністраў, у выканаўчую ўладу, якія прывялі да таго, што на момант анэксіі Крыму ў нас на паперы было шэсць брыгад, з якіх, у рэшце рэшт, удалося сабраць 400 чалавек».

«Прадметам расследавання крымінальнай справы ў Міністэрстве абароны, давядзення абараназдольнасці да такога стану стала дзейнасць такіх міністраў абароны: Шкідчанкі, Марчука, Кузьмука, Грыцэнкі, Еханурава, Ежаля, Саламаціна, Лебедзева, а таксама начальнікаў Генеральнага штаба Узброеных сіл Шуляка, Затынайкі, Кірычэнкі, Свіды, Педчанкі, Заманы», - паведаміў Маціас.

З ягоных слоў, гэтыя асобы «з'яўляюцца прадметам расследавання дзеяння або бяздзейнасці», гэта значыць даецца ацэнка кожнаму з дакументаў, які меў арганізацыйна-распарадчы характар што да абараназдольнасці краіны.