Літва і Нідэрланды хочуць павялічыць падтрымку беларускай апазіцыі

• 18.08.2011, 18:37

Намеснік міністра замежных справаў Літвы Эвалдас Ігнатавічус і амбасадар Нідэрландаў у гэтай краіне Ёзэфус Каміле Стэфан Війнандс, што пакідае сваю пасаду, абмеркавалі 18 жніўня сітуацыю ў Беларусі.

Ігнатавічус падзякаваў амбасадару за падтрымку, аказаную нідэрландскім урадам беларускаму Еўрапейскаму гуманітарнаму ўніверсітэту (ЕГУ), які дзейнічае ў выгнанні ў Вільні, паведамляе сайт МЗС Літвы.

Бакі таксама абмеркавалі магчымасць павелічэння падтрымкі беларускай апазіцыі, яе лепшай каардынацыі, а таксама неабходнасць удасканалення дзеючай сістэмы выдачы шэнгенскіх віз.

Сярод іншага, удзельнікі сустрэчы абмяняліся думкамі аб магчымасцях далейшага эканамічнага супрацоўніцтва паміж Літвой і Нідэрландамі. Гэтая краіна ў цяперашні час займае пятае месца сярод знешнегандлёвых партнёраў Літвы.